-
Yazıçı Şərif Ağayar “Exo” qəzetinə müsahibəsində "PEN klub Azərbaycan" haqda fikirlər deyib:
“PEN klubun təkcə adı var. Əməldə PEN klub da Yazıçılar Birliyi kimi təşkilatdır. Dünyada bizim PEN kluba ciddi yanaşılmır. Azərbaycanda PEN klub yoxdur.”
Çingiz Abdullayev "Exo" qəzetində Şərif Ağayarın fikirlərini, daha doğrusu, özünü tənqid edən müraciət dərc etdirib. Müraciətdə deyilir:
“Görkəmli Azərbaycan yazıçısı” Şərif Ağayarın sizin qəzetdə dərc olunmuş iri həcmli söhbəti ilə yazıçıların hər iki təşkilatında dərhal maraqlandılar. Özünü məşhur hesab edən bu adamı nə yazıçı təşkilatlarında, nə də ümumiyyətlə, yazıçıların və naşirlərin çevrəsində elə də tanıyan yoxdur. Ancaq məsələ bunda deyil.
Onun danışdığı iki nağıl da bu adamın “qeyri- adi istedadından” xəbər verir. Çox təəssüflər olsun ki, onun istedadı başqa-başqa sferalarda özünü büruzə verir. O, bədxah davranışlarına görə Azərbaycan Yazıçılar Birliyinin üzvlüyündən xaric ediləndə utandığından heç nə danışmamış, bir müddət susmağa üstünlük vermiş, yenidən Birliyə üzv olmaq üçün yalvarmaqdan çəkinməmişdir. Onun bu hərəkəti hamıya yaxşı məlum olmuşdur. Həmin vaxtlar AYB-də illik Prezident təqaüdləri verilən məqam olduğundan o təqaüd almaq üçün yenidən yazıçıların siyahına girməli olmuşdur.
Birliyin rəhbərliyi humanist addım ataraq bu mövqesiz “ədəbiyyatçını” yenidən təşkilatın üzvlüyünə qəbul etmişdir. O, il ərzində bu təqaüdü alaraq AYB-nin üzvlüyündən çıxmamış, təşkilatın “qüsurlarından” söhbət açmamış, hər şey onu qane etmişdir. Elə ki, təqaüdün vaxtı bitmiş, bizim “mənəviyyat müdafiəçimiz” dərhal ayrılaraq özünün “prinsipial mövqeyini” xatırlamış və yenidən Birliyi tənqid etməyə başlamışdır. Birliyin ünvanına təhqirlər yağdıran, lakin ikinci dəfə sözügedən təşkilatın üzvlüyündən niyə çıxarılmasını açıb-ağartmayan “məşhur yazıçı” bu barədə susmağa üstünlük vermişdir. O, həmçinin, heç vaxt üzvü olmadığı, fəaliyyətindən məlumatsız PEN klubun da ünvanına tənqidi fikirlər söyləməkdən çəkinməmişdir.
Bir həqiqət budur ki, PEN klubun üzvləri Şərif Ağayardan hər cəhətdən fərqlənən məşhur yazıçılardır. Başqa həqiqət isə budur ki, adı kağız üzərində qalan təşkilatını adi qeydiyyatdan keçirə bilməyən “haqq ədalət carçısı” nəzərə almayıb ki, onun silahdaşları arasında hətta bizim şəhərdə tanına biləcək bir müəllif belə yoxdur. Ancaq o, Azərbaycan Yazıçılar Birliyini tənqid etməkdən həzz alır. O birlik ki, mövcudluğunun səksən ili ərzində birmənalı şəkildə respublikamızın milli və dövlət maraqlarını, ana dilimizi, müstəqilliyimizi müdafiə etmişdir. Yetər ki, AYB-nin binasına daxil olanda həyatını xalqına, onun ədəbiyyatına həsr etmiş və qəfildən repressiya qurbanına çevrilmiş məşhur şair və yazıçılarımızın abidəsini görəsən.
Dövlətimizi dünyada tanıdan xalq şairləri və yazıçıları, akademiklər, görkəmli alimlər, ədəbiyyatşünaslar ölkəmizin fəxarət ünvanıdır. Həmçinin, bizim boşboğazdan fərqli olaraq, Qarabağ uğrunda şəhid olan gənclərimizin fotoşəkilləri də çox şey deyir. Bu müharibədə on bir yazıçı öz övladını itirib.
AYB-ni Stalin dövründən bəri dəyişməyən durğun və ölgün bir təşkilat kimi qələmə vermək ən azı övladlarını məmləkətimizin azadlığı uğrunda itirən yazıçılarımıza hörmətsizlikdir!
Biz bu söhbətə baş qoşmaya da bilərdik. Axı yazı indiyə qədər minlərlə insanın inandığı bir qəzetdə dərc olunub. Məhz buna görə də sizdən xahiş edirik, bizim müraciətimizi dərc edəsiniz. PEN Klub Azərbaycanın rəhbəri Xalq yazıçısı Çingiz Abdullayevdir." (Tərcümə: Kulis-indir)
Yazıçı Şərif Ağayar isə öz Facebook səhifəsində Çingiz Abdullayevə cavab verib:
"Biz Pen klubun fəaliyyətindən danışırıq, o boyda kişi şüvən salıb məni şərləyir ki, diqqəti yayındırsın. Məsələ konkretdir: hanı o PEN klub? Nə iş görür? Və dünya Pen klubları tərəfindən niyə ciddiyə alınmır? Suallar cavabsızdır. Siz özünüz yüksək çinli məmurlara yalvarırsız. Mən yalvaran olsam, sizə niyə yalvarıram, sizin yalvardıqlarınıza yalvararam da, siz kimsiz?"
Bu yazını da oxu: Azərbaycan Pen Klubu Şrödinger pişiyidir
