Siyəzən, Qəbələ və Kürdəmir istiqamətlərinə də raket atıldığı deyilir
Oktyabrın 22-də səhər saatlarında Ermənistandan Azərbaycan ərazisinin əməliyyat-taktiki raket kompleksindən ballistik raketlərlə atəşə tutulduğu bildirilir.
Bu məlumatı da Azərbaycan Müdafiə Nazirliyi (AMN) yayıb.
Məlumata görə, saat 07.00 radələrində Siyəzən rayonu istiqamətində üç, saat 09.00 radələrində Qəbələ rayonu istiqamətində iki, Kürdəmir rayonu istiqamətində isə bir raket buraxılıb: "Ermənistan silahlı qüvvələrinin hədəfi dinc əhali və mülki infrastruktur olub".
Nazirlik habelə bildirir ki, raket hücumu nəticəsində tələfat yoxdur.
Hər üç rayon cəbhə bölgəsindən kənarda yerləşir.
Azərbaycan mövqelərinin atəşə tutulduğunu bildirir
Oktyabrın 22-də saat 09:15-dən başlayaraq Ermənistan silahlı qüvvələrinin Azərbaycanın işğal olunmuş ərazilərindən Füzuli rayonundakı mövqelərini reaktiv artilleriya sistemlərindən atəşə tutduğu deyilir.
Bu barədə Azərbaycan Müdafiə Nazirliyi (AMN) oktyabrın 22-i, saat 9:40 radələrində məlumat yayıb.
Cəbhədə oktyabrın 22-nə olan vəziyyət
Oktyabrın 21-i gün ərzində, habelə 22-nə keçən gecə cəbhənin Ağdərə-Ağdam, Füzuli-Cəbrayıl və Zəngilan-Qubadlı istiqamətlərində döyüş əməliyyatlarının müxtəlif intensivliklə davam etdiyi bildirilir.
Bu barədə Azərbaycan Müdafiə Nazirliyi (AMN) oktyabrın 22-i, səhər saat 8:45 radələrində məlumat yayıb.
Məlumatda qeyd edilib ki, qarşı tərəf Azərbaycanın müdafiə mövqelərini atıcı silahlar, minaatanlar və toplardan atəşə tutub. Açıqlamaya görə, Azərbaycan ordusunun keçirdiyi əməliyyat nəticəsində cəbhənin Qubadlı istiqamətində Ermənistan silahlı qüvvələrinin müdafiə olunan bölmələri vacib yüksəklik və bir sıra mövqelərdən geri çəkilməyə məcbur edilib: "Hazırda bütün cəbhə boyu döyüşlər davam edir. Qoşunlarımız əməliyyat şəraitinə nəzarət edir".
