“Bu addımların arxasında ailənin hansısa planlar var”
“Ölkəni dəyişmək lazımdır, Konstitusiyanı yox. Ölkəni inkişaf etdirmək, təkmilləşdirmək, demokratikləşdirmək lazımdır. Bu dəyişikliklər nə demokratiyanı inkişaf etdirmək, nə də siyasi sistemi təkmiləşdirmək üçündür. Onlar ilk növbədə, ailə hakimiyyətinin əbədiləşdirilməsinə konstitusion təminatlar vermək üçün atılan addımlardır”.
Bunu Milli Şuranın sədri Cəmil Həsənli Konstitusiyaya yeni dəyişikliklər təklifini şərh edərkən bildirib. (Ətraflı)
“Dəyişikliklər mövcud prezident üsul-idarəsini o dərəcədə də dəyişmir”
“Prezident belə bir təşəbbüslə çıxış edibsə, orda kifayət qədər əsaslandırılmış siyasi motivlər var. Müxalifət çox şey deyə bilər. Fikrimcə, dəyişikliklər mövcud prezident üsul-idarəsini o dərəcədə də dəyişmir”.
Bunu millət vəkili Rasim Musabəyov Konstitusiyaya yeni dəyişikliklər təklifi haqda deyir. O, prezident seçilmək üçün 35 yaş məhdudiyyətinin aradan qaldırılması haqqında söyləyir ki, bu, xalqın seçimi olacaq:
“Hər bir halda o adamı xalq seçəcək. Xalq hesab etsə ki, 30 yaşında da bu adam prezidentliyə layiqdirsə, onu seçəcək. Hesab etməsə, seçməyəcək. Ancaq ortada namizəd yoxdur ki, biz onun haqqında deyək ki, “mümkündür, yoxsa, yox”. Məni daha çox parlamentlə bağlı maddə maraqlandırmışdı. Prezidentin Milli Məclisi buraxmasına dair maddələr bir çox ölkələrin Konstitusiyalarında da mövcuddur” .
"Burda qeyri-demokratik heç nə yoxdu"
“Konstitusiyaya dəyişiklik təkliflərində qeyri-demokratik müddəa yoxdur”.
Bunu Milli Məclisin üzvü Rövşən Rzayev prezidentə parlamenti buraxmaq səlahiyyətinin verilməsi təklifini şərh edərkən deyib.
Rövşən Rzayev bu müddəanın parlamentin cəmiyyətdə bir hakimiyyət qolu kimi rolunu azaldacağı barədə fikirlərlə razılaşmır, deyir ki, əksinə, Azərbaycanda olan “siyasi model kifayət qədər uğurludur”. Ətraflı
"Konstitusiyanın özünə ziddir"
“Konstitusiyaya bəzi təkliflər Konstitusiyanın özünə ziddir, referenduma çıxarıla bilməz”
Hüquqşünas Fuad Ağayev deyir ki, 155-ci maddə hüquqların məhdudlaşdırılması ilə bağlı təkliflərin Referenduma çıxarılmasını qadağan edir. Ətraflı
