«bp-Azərbaycan» şirkəti avqustun 6-dan Bakı-Tbilisi-Ceyhan kəmərində baş vermiş qəzaya görə istehsalı aşağı salıb. Şirkətin mətbuat xidmətinin rəhbəri Tamam Bayatlı «Azadlıq» radiosuna bildirib ki, neft və qaz hasilatı davam edir:
«Neft hasilatı Səngəçal terminalındakı ehtiyat saxlanma yeri və qalan ixrac yollarının neftgötürmə gücü ilə uzlaşdırılır».
BTC-nin Türkiyə ərazisindən keçən hissəsində avqustun 6-da yanğın baş verib. Həmin gündən boruda neftin nəqli dayandırılıb. Bu vaxta kimi qəzanın nəticələri aradan qaldırılmayıb.
T.Bayatlı onu da bildirib ki, Bakı-Tbilisi-Ərzurum kəməri ilə qaz, Bakı-Supsa kəməri ilə isə neft nəqli Gürcüstanda baş verən hadisələrlə əlaqədar dayandırılıb:
«Buna baxmayaraq, həm Türkiyə, həm də Gürcüstan kəmərdə olan qazı alır, eyni zamanda hasilat da davam edir».
«Əsrin Müqaviləsi» çərçivəsində Azəri-Çıraq-Günəşli yataqlarından çıxarılan neft hazırda Bakı-Novorossiyski kəməri və dəmiryolu vasitəsi ilə nəql edilir.
