Daxili İşlər Nazirliyindən bildirirlər ki, polis ölkənin hər yerində dini situasiyanı nəzarətdə saxlayır Məlumata görə, Gəncə şəhəri Kəpəz rayon Polis Şöbəsi əməkdaşları Elmir Mehdiyevin mənzilində «Nurçuluq» dini təriqətini təbliğ etdikləri üçün bir qrup şəhər sakini polis bölməsinə gətiriblər. E.Zahidov deyir ki, ərazidə qonşuların müraciəti əsasında tədbir keçirilib:
«Təxminən 11 nəfər saxlanılıb. Onların üçü barəsində İnzibati Xətalar Məcəlləsinin müvafiq maddəsi ilə protokol tərtib olunub. Qalanları isə izahatları alındıqdan sonra buraxılıblar».
E.Zahidov onu da deyir ki, polis ölkənin hər yerində dini situasiyanı da nəzarətdə saxlayır.
Dini Qurumlarla İş üzrə Dövlət Komitəsinin Gəncə regional bürosunun şöbə müdiri Firdovsi Kərimov Gəncədə «Nurçuluq» təriqətinə aid iki dini icma olduğunu deyib:
«Onlara qeydiyyatdan keçməyi təklif etdik amma onlar qeydiyyatdan keçmədilər. Ona görə də iki il bundan əvvəl onların fəaliyyətinə xitam verildi. Amma belə məlumatlar da var ki, icma üzvləri hardasa qeyri-qanuni toplaşırlar. Halbuki yeni qanuna görə, qeydiyyatsız fəaliyyət göstərmək olmaz».
