Xədicə İsmayılova:
- Efirdə işdən sonra proqramı öz qonağı ilə birlikdədir. Qonağımız Müsavat partiyasının başqanı İsa Qəmbərdir. İsa Bəy həftəsonu İlham Əliyevin müsahibəsi və qarlı günlərlə yadda qaldı. Siz həftə sonlarını necə etdiz, qərargaha getdinizmi, sizin də hərəkət məhdudiyyətiniz var idimi?
İsa Qəmbər:
- Bizim evimiz qərargaha yaxındır. Sağ olsun hökumət, 2003 – cü il seçkilərində faktiki biz qalib gələndən və seçkilər saxtalaşdırılandan sonra şəhərin mərkəzindəki qərargahı əlimizdən aldılar, bizi Dərnəgüldəki köhnə bir binaya köçürdülər. Yeganə üstünlüyü ondadır ki orada havalar daha yaxşıdır və evimizə yaxındır. Evimizə yaxın olduğu üçün iş yerinə gedə bilirəm. Həftəsonuinun ən maraqlı təzadı ondan ibarət oldu ki Bakıya bir balca qar yağan kimi Bakı, bütövlükdə Azərbaycan problemlərin məngənəsində yaşamağa başladı. İşıq yox, istilik yox, qar yox, yollar bərbad, nəqliyyat pis işləyir və belə bir vəziyyətdə İlham Əliyev də Avropada deyir ki Azərbaycan Avropanın enerji problemini həll etməyə qadirdir və hazırdır. Çox paradoksal bir vəziyyət yaranmışdı, öz ölkəsində vətəndaşların istilik problemlərini həll edə bilməyən adicə işıq problemini, yanacaq problemini həll edə bilməyən hakimiyyət nümayəndəsi Avropanın enerji problemini həll etməyə hazırlaşır.
Xədicə İsmayılova:
- Amma bu sualları verərkən bu iddiaları ortaya qoyarkən həm də əmin olmaq lazımdır ki siz olsaydınız başqa cür olardı, siz olsaydınız daha yaxşısını edərdiniz, belə əminlik varmı?
İsa Qəmbər:
- Təbii, ən yaxşısı o olardı ki 93- cü ildə İlham Əliyevin atası hərbi çevriliş yolu ilə hakimiyyətə gəlməyəydi, Azərbaycanda demokratik hakimiyyət davam edəydi. Əgər Azərbaycanda demokratik hərəkat davam etsəydi Azərbaycan çoxdan Qarabağ məsələsini də həll etmişdi, infrastruktur məsələləri də həllini tapmışdı və Azərbaycan tamamilə normal ölkəyə çevrilmişdi 20 ilə yaxın müddətdə. Təbii ki həmin bu problemlər yaşanmayacaqdı. Eyni zamanda indiki ən ağır vəziyyətdə də Müsavat partiyası real demokratik qüvvələr hakimiyyətə gələrlərsə bunların hamısının həlli realdır mümkündür və biz bunların həlli yollarını bilirik.
Xədicə İsmayılova:
- Amma sizə də irad tuta bilərlər ki sizin AXC ilə birlikdə hakimiyyətdə olduğunuz dövrdə heç də yolların təmizliyi, çörək növbələrinin olmaması ilə yadda qalmayıb. Yəni problemlər o vaxt da var idi.
İsa Qəmbər:
- Mən bilmirdim ki Azadlıq radiosunun əməkdaşları da Əliyev rejiminin uydurduqları əfsanələrə inanmağa başlayıblar. Bizim bir illik hakimiyyət dövrümüzdə yenicə çökmüş iqtisadiyyata sahib olan, müharibə aparan bir rejim olaraq bir ildə görülən bütün müsbət işlərin səviyyəsi də, keyfiyyəti də Əliyev rejiminin 17 illik fəaliyyətindən qat – qat yüksəkdə dayanır. Hesab edirəm ki o dövrü yaşamayan gənclər, yenuyetmələr, qərəzli insanlar AXC hakimiyyəti dövrünə bu cür qərəzli qiymət verə bilərlər.
Xədicə İsmayılova:
- Siz yenə bir balaca tənqid eşidən kimi bütün bunları uydurma adlandırırsınız. Bəlkə nə vaxtsa səhvləri etiraf etmək lazımdır?
İsa Qəmbər:
- Səhvlər olur. İş olan yerdə səhv də olur. Amma bizim bir illik hakimiyyətdən 17 il keçəndən sonra yenə də indiki rejim, indiki hakimiyyət özünün həll edə bilmədiyi problemləri bizim boynumuza atmağa çalışanda və bəzən kimlərsə buna rəvac verəndə təbii ki bu bir balaca qəribə görünür.
Xədicə İsmayılova:
- Mən bilmirəm kim kimə rəvac verir amma hər halda mənim kifayət qədər yaşım var ki o vaxt durduğum çörək növbələrini xatırlayam.
İsa Qəmbər:
- Yaxşı iş görməyiblər sizin kimi xanımı çörək növbəsinə göndərməkdə amma mənə elə gəlir ki siz şişirdirsiniz.
Xədicə İsmayılova:
- Sizə elə gəlir ki biz şişirdirik.
İsa Qəmbər:
- Amma yenə də seçin, Elçibəy demokratik hakimiyyəti və İlham Əliyev, Heydər Əliyev hakimiyyəti. Hansı sizə xoş gəlirsə onu seçə bilərsiniz. Bu sizin ixtiyarınızdadır.
Xədicə İsmayılova:
- Amma söhbət şəxsən mənim seçimimdən getmir.
İsa Qəmbər:
- Həm də sizin seçimininizdən gedir. Bizim hakimiyyətə kölgə atmaqla siz indiki hakimiyyətin işinə rəvac vermiş olursunuz.
Xədicə İsmayılova:
- Niyə siz hökmən müqayisədə yaxşı olduğunuzu sübut etmək istəyirsiniz. Sadəcə yaxşı olmaq olmazmı?
İsa Qəmbər:
- Müqayisəni siz başladınız. Mən Əliyev dövrünü tənqiddən başladım siz isə müqayisəyə gətirdiniz. Odur ki müqayisəni mən başlamadım.
Xədicə İsmayılova:
- Sadəcə demək istədim ki əminsinizmi ki daha fərqli olardınız?
İsa Qəmbər:
- Əminəm, və əslinə qalsa qərəzsiz insanların hamısı da bilirlər ki Azərbaycanda demokratik proses davam etsəydi Azərbaycanda vəziyyət indikindən qat – qat yaxşı olardı və köklü problemlər də həll olunmuş olardı.
Xədicə İsmayılova:
- Kimlər qərəzlidir kimlər qərəzli deyil bunu necə müəyyənləşdirirsiniz? Sizə tənqid tuşlayan insanları qərəzli adlandırırsınız yoxsa başqa meyarlar da var?
İsa Qəmbər:
- Müxtəlif meyarlar var, ən önəmli meyar siyasi maraqların olmamasıdır. Siyasi maraqları olmayan insanlar təbii ki bir qayda olaraq məsələyə daha obyektiv yanaşırlar və obyektiv qiymət verirlər.
Xədicə İsmayılova:
- Siyasi maraqları olmayan insanlar məncə heç sizin haqqınızda danışmırlar.
İsa Qəmbər:
- Mübahisəli fikirdir amma bu cür əhəmiyyətsiz məsələ ətrafında mübahisə etmək istəmirəm.
Xədicə İsmayılova:
- Sizcə əhəmiyyətsizdir. Amma belə də deyirlər ki, müxalifət partiyaları siyasətdən kənar qalan, siyasətlə maraqlanmayan, güzaranı yaxşı olmadığından ümumiyyətlə siyasətlə maraqlanmağa vaxtı olmayan insanları cəlb etməlidirlər. Onlar əhəmiyyətsizdirlər?
İsa Qəmbər:
- Yox, siz məsələni qarışdırmayın. Bu gün cəmiyyətdə siyasi proseslərə marağın azalması göz qabağındadır. Və bütün real müxalif qüvvələrin o cümlədən Müsavat partiyasının da vəzifələrindən biri də ictimai proseslərə marağı bərpa etməkdir. Mən siyasi marağın olub olmaması dedikdə onu nəzərdə tuturam ki həmin şəxs özü şəxsən hakimiyyətə gəlmək barədə düşünürmü, deputat seçilmək haqqında, bələdiyyəyə gəlmək haqqında düşünürmü yoxsa bir vətəndaş kimi istəyir ki bu ölkə normal bir ölkəyə çevrilsin və problemlər həll olunsun. O da bir vətəndaş kimi yaşaya bilsin. Fərq burasındadır. Ona görə onları məsələyə qarışdırmayaq. Təbii ki cəmiyyəti fəallaşdırmaq, ictimai proseslərə marağı artırmaq üçün ilk növbədə mediaya ehtiyac var. Bu gün televiziyalar müxalifətin də üzünə bağlıdır və ciddi real problemlərin obyektiv müzakirəsi üçün də bağlı vəziyyətdədir. Ona görə də cəmiyyətə informasiyanın ötürülməsi üçün zəruri olan televiziyalar faktiki olaraq bu prosesdən kənar qalır, bu prosesdə iştirak etmirlər. Qəzetlərə qaldıqda qəzetlər də təəssüf ki hakimiyyətin təsirləri nəticəsində əhəmiyyətli dərəcədə zəifləyiblər. Çox az qəzet qalıb ki onlar imkan daxilində cəmiyyəti məlumatlandırmağa çalışırlar. Amma qəzetlərin tirajını da nəzərə alsaq, insanların alıcılıq qabiliyyətini də nəzərə alsaq qəzetlərin də imkanlarının məhdud olduğunu görürük. Az – çox qərb mərkəzlərinin yaratdığı radiolar cəmiyyəti məlumatlandırmağa yardım edirdilər, amma həmin radiolar, sizin radionuz, hakimiyyətin səyləri nəticəsində populyar dalğalardan kənarlaşdırıldıqdan sonra bu imkanlar da təəssüf ki xeyli dərəcədə azalıb. Amma buna baxmayaraq nə imkan varsa, nə resurs varsa ona əsaslanaraq cəmiyyəti məlumatlandırmalıyıq, bu müxalifət partiyaların da vəzifəsidir, obyektiv olan medianın da vəzifəsidir ki cəmiyyət proseslərdən məlumatlandırılsın.
Xədicə İsmayılova:
- Nə qədər auditoriyanız var? Sizin mesajı nə qədər adam oxuyur?
İsa Qəmbər:
- Fərqli auditoriyalar var. Tutaq ki aparıcı qəzetlərdə mənim fikirlərim nəşr olunursa, məsələn Müsavat qəzetinin on mindən yuxarı tirajı var. Və hər qəzeti bir neçə nəfərin oxuduğunu düşünsək kifayət qədər geniş auditoriya var. Yaxud bu gün “Azadlıq radiosunda” çıxış edirəmsə “Azadlıq radiosunu” son zamanlar nə qədər adamın dinlədiyini siz məndən yaxşı bilərsiniz mənim üçün də maraqlı olar son rəqəmi eşidəm nə qədər adam dinləyir bizi.
Xədicə İsmayılova:
- Hələ ki siz mənə bir rəqəm deyin, o vaxt ki siz rAzadlıq radiosunda deyilsiniz sizin səsiniz nə qədər adama çatır.
İsa Qəmbər:
- Mən sizə izah etməyə çalışdım ki müxtəlif göstəricilər var. Mediadan söhbət gedirsə televiziya çox nadir hallarda bizim haqqımızda sujet göstərir. 31 yanvarda Müsavat partiyası Novxanıya getdi və M. Ə. Rəsulzadənin doğum gününü onun doğma kəndində qeyd etdik. ANS bir sujet çəkib göstərdi. Təbii ki onda yüz minlərlə adam bizi gördü və bildi ki fəallıq göstəririk.
Xədicə İsmayılova:
- Deməli fəallıq göstərəndə sizi də göstərirlər.
İsa Qəmbər:
- On dəfə fəallıq göstərəndə bir dəfə göstərə bilərlər. Bizim 2009- cu ildə iki böyük kompaniyamız olub. Referendum kompaniyası və Bələdiyyə seçkiləri. Ancaq bu kompaniyalardan hansı elementlər radioya, televiziyaya çatdırılıb, bu özü də maraqlı bir tədqiqatın nəticəsi ola bilər. Ancaq burda müəyyən məqamlar var. Bu gün bizim sözümüzün çatdığı auditoriyanın rəqəmi fərqli ola bilər. Fərqli məqamlar ondan ibarətdir ki bu gün Müsavat partiyasının ölkənin hər yerində təşkilatları var. Və bizim mövqeyimiz yuxarıdan aşağı, aşağıdan yuxarı ötürülərək demək olar ki ölkənin hər yerinə çatdırılır. Ölkə əhalisi Müsavat partiyasının mövqeyindən xəbərdardır və bizim bunu söyləməyə əsasımız var.
Xədicə İsmayılova:
- İstənilən halda belə bir məhdudiyyətlərlə üzləşirsiniz, sizin toplaşma azadlığınızın pozulmasını iddia edirsiniz.
İsa Qəmbər:
- İddiaya ehtiyac yoxdur, bu bir gerçəklikdir.
Xədicə İsmayılova:
- Efirə çıxışınız azdır. O halda necə düşünürsünüz İlham Əliyev müxalifət zəifdir deyərkən haqlıdırmı? Bu həqiqətdirmi?
İsa Qəmbər:
- Bu həqiqət deyil. Bu cəfəngiyyatdır. Ölkə müxalifəti çox güclüdür. Sadəcə olaraq onun gücü latent vəziyyətdədir. Yəni görünmür. Amma bu real güc var və bunu İlham Əliyev də hakimiyyət də hamıdan yaxşı bilirlər sadəcə bunu inkar edirlər. Ancaq bunu inkar etməkçün İlham Əliyev çox absurd arqument səsləndirdi ki Azərbaycanda iqtisadi inkişaf var ona görə də xalq, cəmiyyət müxalifətə ehtiyac duymur. Xüsusilə də Avropa tamaşaçısına bunu söyləmək çox yanlış mövqedir. Çünki Avropanın bütün ölkələrində həyat səviyyəsi Azərbaycanla müqayisə edilməyəcək qədər yüksəkdir. Avropada iqtisadi inkişaf səviyyəsi, miqdarı, göstəriciləri Azərbaycanla müqayisə edilməyəcək qədər yüksəkdir. Buna baxmayaraq Avropada hakimiyyət partiyaları olduğu kimi müxalifət partiyaları da var. 4-5 ildən bir ən uzağı 8-10 ildən bir müxalifət və iqtidar yerini dəyişir. Ona görə də guya iqtisadi inkişafın yüksək olması, həyat səviyyəsinin yüksək olması müxalifətin zəifliyinə gətirir çıxarır arqumenti diqqətə alınmayacaq qədər zəif arqumentdir.
Xədicə İsmayılova:
- Gəlin İlham Əliyevin səsini dinləyək
İsa Qəmbər:
- İlham Əliyevçün darıxan varsa dinləsin.
İsa Qəmbər:
- Mənə elə gəlir ki mən İlham Əliyevin arqumentinə cavab verdim. Bu o qədər gülünc arqumentdir ki bunu dilə gətirmək özü ayıbdır. Bunu eşidənlər sadəcə olaraq gülürlər. Xüsusilə qərblilər, avropalılar.
Xədicə İsmayılova:
- Siz rəqibinizin əhəmiyyətini azaltmırsınızmı? Bəli ola bilsin Avropada ona gülsünlər, ola bilsin qeydi – ciddi arqument səsləndirsin siz də bunu ağıllı cavab hesab etməyəsiniz amma hakimiyyətdə olan odur, təzyiqlərə məruz qalan sizsiniz. Yəni nəticə etibarilə uduzan kimdir?
İsa Qəmbər:
- By siyasətşunaslıqda çoxdan həllini tapmış məsələdir. Yəni sual təxminən bu cür qoyulur ki onillərlə hakimiyyətdə qalmağı bacaran siyasətçi güclü siyasətçidir yoxsa demokratikaya önəm verən, bir neçə müddət seçilib sonra növbəti seçkidə uduzub hakimiyyəti başqasına təhvil verən siyasətçi güclüdür. Bu çoxdan həllini tapmış məsələdir. Diktator olmaq göründüyü qədər də çətin məsələ deyil. Tarix boyunda da bir çox adamlar diktatura qurublar, nə cür qurtarıb onların da sonu, aqibəti bəllidir. Ona görə də zorakılıqla, xalqa qarşı zor tətbiq etməklə, güc tətbiq etməklə hakimiyyəti saxlamağı güc əlaməti, ağıl əlaməti hesab etmək mənə elə gəlir lüzumsuzdur. O ki qaldı Azərbaycanda İlham Əliyev gözəl bilir ki bu gün xalqın əhval ruhiyyəsi dəyişiklik əhval ruhiyyəsidir. O və onun ətrafındakılar da gözəl bilirlər ki bu gün Azərbaycanda normal seçki keçirilsə seçici indiki hakimiyyətə səs verməyəcək. Dəyişiklik tərəfdarlarına səs verəcək. Müsavatmı olacaq, başqa bir real müxalifət partiyası olacaq , başqa bir hansısa yeni bir qüvvə olacaqmı bu diskussiya mövzusu ola bilər. Amma İlham Əliyev gözəl bilir ki xalq ona səs verməyəcək, xalq YAP- a səs verməyəcək. Məhz buna görə bizləri televiziyaya yaxın buraxmırlar. Məhz buna görə televiziyalarda real problemlərin obyektiv müzakirəsi getmir, məhz buna görə kütləvi tədbirlər qadağan olunub, faktiki ölkədə fövqəladə vəziyyətdir. Məhz buna görə söz azadlığının qadağan olunması, qəzet redaktorların, gənc bloqqerlərin həbs olunmasının səbəbi budur. İlham Əliyev bunları bilir, bunları bildiyi üçün də bunları edir.
Xədicə İsmayılova:
- Görəsən sizə basqı etməsəydilər öz gücünüzü sübut etmək üçün başqa nə arqument gətirərdiniz?
İsa Qəmbər:
- Bizə basqı etməsəydilər, xalqa basqı etməsəydilər, bu zorakılıqlar, bu saxtakarlıqlar olmasaydı Müsavat partiyası artıq çoxdan hakimiyyətdə idi, Xədicə xanım. 2003 – cü ildə ən azı, mən hələ 2002 – ci ildə parlament qələbəmizi demirəm çünki o proporsional sistem üzrə seçki idi amma 2003 – cü ildə prezident seçkilərində Müsavat partiyası aparıcı rol oynamışdı, bizim Azərbaycan bloqu qalib gəlmişdi bunu da Azərbaycanda hər kəs bilir.
Xədicə İsmayılova:
- Görək dinləyicilər nə deyirlər. Xəttə dinləyici var,
Səlim Dadaşov:
- Mənim İsa Bəyə sualım var. Sualı verməmişdən qabaq müraciət etmək istəyirəm Azərbaycan Respublikasının prezidenti İlham Əliyevə, deyirsiniz Azərbaycanda müxalifətə ehtiyac yoxdur. Amma şəxsən mənim ehtiyacım var. Həmin o müxalifətin iqtidar olmasına ehtiyacım var, çünki mənim 21 yaşım var, mən 17 yaşımdan bu cəmiyyətin çətinliklərini görmüş adamam və müxalifət liderlərinin əksəriyyəti də məni tanıyır. Ali təhsilim yoxdur, ali təhsil ala bilməmişəm. Günah da bu hakimiyyətin günahıdır ki uşaqlıqdan mən əzab əziyyətə işləməyə məcbur olmuşam. Atam təqaüdçüdür, anam işləmir. Sualım İsa bəyə odur ki iki- üç partiyanın birləşməsi ilə nə isə bir toplum yaratmaq çətindir. Siz real olan və olmayan qüvvələrdən, müxalifət qüvvələrindən danışırsınız. Mən sizə belə demək istəyirəm, real olmayan müxalifət liderinin yanında azından 4-5 min həmin partiyanın üzvü var. Həmin o partiyanı real olmayan müxalifət adlandırmaq düzgün deyil. Bizim özümüzün üzvlərimiz həddindən artıq çoxdur.
Xədicə İsmayılova:
- Hansı partiyanın üzvüsünüz?
Səlim Dadaşov:
- Mənim adım Ümid partiyasında gedir, İqbal Ağazadənin partiyasında.
Xədicə İsmayılova:
- Adım Ümid partiyasında gedir nə deməkdir?
Səlim Dadaşov:
- Yəni orada qeydiyyatdayam. O partiyanın üzvüyəm. Sadəcə bir balaca gəlib gedə bilmirəm. Çətinlikdəyəm də, imkanım yoxdur gedib gəlməyə. Amma Ümid partiyasının üzvü olmamla da yanaşı digər müxalifət liderləri ilə də tanış olmağa çalışıram. Mən bütün müxalifətin birləşməsini istəyirəm. Fərqi yoxudr İsa Qəmbər, İqbal Ağazadə, Lalə Şövkətqızı, Sərdar Cəlaloğlu mən istəyirəm bunlar birləşib parlament seçkilərinə bir getsinlər. Əgər birlik olsa mən əminəm, ümidvaram ki biz qələbə çalacağıq. Çünki artıq millət bezib.
Xədicə İsmayılova:
- Moşu Göyəzənli yazır, “ deyək ki, Müsavat parlamənt seçkilərinə getdi və kifayət qədər uğur qazandı.Bəs Müsavat seçkilərdə iqtidarın saxtakarlığını hansı yolla almagı planlaşdırıb?Mən əminliklə deyə bilərəm ki, Məzahir Pənahov bu işdə artıq sənətkardır və ora partiyadan müşahidəçi qoymaqla bunun qarşısını almaq qeyri-mümkündür.Çünki millətimizin özündə də hələ seçki mədəniyyəti yoxdur.Büdcə təşkilatları müxalifətə səs vermək istəsə belə,bunun qarşısında acizdirlər çünki hökumətin verdiyi qəpik quruş maaşı da itirmək istəmirlər.(P.S. mən onları qınamıram,çünki başqa gəlir yeri də yoxdur)
Əgər saxtakarlığın qarşısı alına bilməyəcəksə Müsavatdan biz nə gözləməliyik? Daha doğrusu Parlament seçkilərindən sonra nə gözlənilir? Millətimizə xoşbəxtlik arzularıyla”
Elnur Məlikov yazır, “ İsa bəy hazırki tərkiblə Mərkəzi Seçki Komissiyasının seçki saxtakarlığına yol verməyəcəyi halda seçkinin nəticələrini tanıyacaqsınızmı? Yox, əgər seçkinin saxtalaşdırılmasından şübhəniz varsa onda seçkiyə qatılmanız hansı məntiqə sığır?
Sonuncu parlament seçkilərindən sonra partiyanızın tərkibi neçə faiz artıb və ya azalıb?
Zəruri halda küçə yürüşlərinə bir milyon adamın səfərbər edilməsi üçün nəticəsinə əmin olduğunuz planınız varmı?” Dinləyicilərin kifayət qədər yüksək gözləntiləri var. Məryəm Şahverdi yazır “ İsa bəy necəsiniz, parlament seçkilərinə gedəcəksinizmi? Xədicə xanım qaldı ki, çörək növbələrinə bu növbələr xalq cəbhəsi dövründə olmamışdı”. Zülfiqar yazır,
“ Neft, qaz, qızıl içində üzən azərbaycanlıların qazsız, işıqsız, odunsuz bölgəsindən – Saatlıdan akkumlyatorla sizi dinləyirik. Hikmət bəy yazır, “ salam, qarın yağmasına hazırlıqlı olmayan hökumətin müharibəyə necə hazırlıqlı olması şübhə doğurur.”. “ Salam İsa bəy, dəmiryolçuların iş saatını 4 saat etdilər. Amma nə edək iqtisadiyyatda birinciyik”, “ mən şəxsən burada yaşamaqdan bezmişəm, imkan olsaydı elə gedərim buradan”, “ Azadlıq radiosu hərdən özünü AZTV kimi aparır. Çox təəssüf, ədalətli olmaq lazımdır. Yoxsa siz də nüfuzunuzu itirəcəksiniz, ölkəmizdəki telekanallar kimi. Mən müxalifətçi deiyləm, nə də YAPçı. Nemət”.
Azadlıq radiosu əgər cəmiyyətdə qonağa suallar varsa o sualları verməyi özünə borc bilir. İsa Bəy, özünü demokrat adlandıran adam özünə yönlənən sualları bir az daha gərək dözümlü qarşılasın.
İsa Qəmbər:
- Məmnuniyyətlə Xədicə xanım. Təbii ki biz hakimiyyətə gəldiyimiz gündən xalqla təmasdayq. Xalqın istənilən sualına cavab verməyə hazırıq. Heç bir sualdan da heç zaman yayınmamışıq. O ki qaldı suallara o qədər çox sual verildi ki ayrıca bir veriliş lazımdır suallara cavab verməkçün. Xoşuma gələn məqam o oldu ki, deməli insanlar qulaq asırlar. Bu insanlar həqiqəti, obyektiv fikirləri, təvazökarlıqdan uzaq olsa da inandıqları adamları eşitmək istəyirlər. Vəziyyətə gəldikdə isə ən çox xoşuma gələn sözlərdən birini verilişlərin birində elə Həsən Kərimov demişdi. Soruşmuşdular ki, hakimiyyət qışa hazırdırmı, o cavab vermişdi ki Hakimiyyət nəinki qışa heç yaya da hazır deyil. Hakimiyyətin səviyyəsi, hakimiyyətin səriştəsizliyi, görməmişliyi o səviyyədədir ki hakimiyyət nə qışa nə də yaya hazır deyil. Birinci sual, konkret sual idi, Səlim Dadaşovun sualı, mən o gəncin səmimiyyətinə inanıram. Çox gəncdir. Mənim Səlim bəyə bir tövsiyyəm var, siz Ümid partiyasının üzvüsünüz, bu sizin seçiminizdir, seçkidə də situasiyaya baxıb qərarı verin, vicdanınıza uyğun hərəkət edin, siz ondan asılı olmayın ki müxalifət partiyaları sizin saydığınız hamısı birləşdimi, yoxsa onların bir qismi birləşdimi. Bu reallıqdan asılı olacaq, vəziyyətdən asılı olacaq. Sizin ağlınızın sizə diktə etdiyi qərar ən düzgün qərar olacaq. Mən buna əminəm. Moşu Göyəzənlinin sualı ki seçkilərdə saxtalaşdırılmanın qarşısını ala biləcəksinizmi, maraqlı sualdır, Moşu müəllimə açıq şəkildə, səmimi şəkildə mən də deyim ki, saxtakarlığın qarşısının alınması mexanizmi sadəcə və yalnız neçə partiyanın bir araya gəlməsində deyil. Cəmiyyət fəal olmasa, cəmiyyət saxtakarlığa etiraz etməsə, partiyalar cəmiyyətdən təcrid olunmuş vəziyyətdə olsalar bu saxtakarlığın qarşısı alına bilməz. Siz bir vətənpərvər vətəndaş olaraq seçki məntəqəsində çalışan insanları bəlkə də tanıyırsınız. Onlar axı aydan, marsdan gəlməyiblər. Onlar sizin qohumlarınızdır, sizin jek-də işləyən insandır, sizin uşaqlarınızın dərs aldığı məktəbdə dərs deyən müəllimdir, polikninikada sizi müalicə edən həkimdir. Siz onları tanıyırsınız. Siz onları tənqid etməlisiniz ki, sən niyə mənim səsimi oğurlayırsan, sən niyə mənim səsimi saxtalaşdırırsan. Belə bir ictimai etiraz olsa, seçki komissiyalarında işləyən insanları qınaq obyektinə çevirib onları bir az məsuliyyətli olmağa məcbur etsək, seçkilərdə öz səsimizi qorumağa elliklə hazır olsaq o zaman bu saxtakarlığın qarşısını almaq mümkün olacaq. Yoxsa siz düşünsəniz ki müxalifət var, müxalifət var müxalifət yığışsın bu məsələni həll etsin, bu çox çətindir. Mən demirəm ki mümkün deyil, ancaq çox çətin bir məsələdir.
Xədicə İsmayılova:
- Xəttə daha bir dinləyici var onu da eşidək sonra davam edək sizi dinləməyə. Eşidirik sizi.
Dinləyici:
- Salamlar sizə və İsa bəyə. İkinci də mən arzu edərdim ki İsa bəy hər hansı partiyanın birləşməsi ideyasını yox, milli azadlıq cəbhəsini, milli qurtuluş cəbhəsini yaratsın ki bütün partiyalar, bütün xalqsevər, millətsevər camaat da ora qoşulub, hakimiyyətin öhdeəsindən gələ bilsinlər.
Xədicə İsmayılova:
- Bunu məhz İsa bəydən gözləyirsiniz?
Dinləyici:
- Yox, ümumiyyətlə Azərbaycan xalqından, millətdən, hamıdan bunu gözləyirəm. Adım Qurbandır. İdeya uğrunda fəaliyyət göstərsinlər, milli qurtuluş, milli azadlıq cəbhəsinin yaranması uğrunda iş görsünlər. Mən bunu arzu edərdim.
Xədicə İsmayılova:
- Təşəkkür edirəm efirə qoşulduğunuz üçün və arzularınızı bildirdiyiniz üçün. İsa bəy...
İsa Qəmbər:
- Qurban bəy öz arzularını bildirdilər. Mən Qurban müəllimi də bütün dinləyicilərimizi də bir şeyə əmin edə bilərəm. Müsavat partiyası 100 ildir ki Azərbaycan uğrunda mübarizə aparır. Bu mübarizə bu gün də davam edir. Bir an da şübhəniz olmasın ki Müsavat partiyasının bu yolda hər hansı tərədddüdü ola bilər. Biz bu mübarizəni davam etdiririk. Bütün böhtanlara, çətinliklərə, ətrafımızdakı oyunlara da baxmayaraq. İnanırıq ki Azərbaycan xalqının gələcəyi, inkişafı bu mübarizədən asılıdır. Bunu bilməyimiz bizə güc verir. Bu yolu biz davam etdirəcəyik. Mən inanıram ki bu ideya ətrafında, Müsavat partiyası ətrafında, Rəsulzadə, Elçibəy ətrafında nə qədər çox insanımız, vətəndaşımız, seçmənimiz birləşsə hədəflərə daha tez çatacağıq.
Xədicə İsmayılova:
- Seçmənlər həm də sizin birləşmənizi istəyirlər. Müxalifət qüvvələrinin birləşməsini istəyirlər. Mümkündürmü seçkilərdən əvvəl birləşmə olsun.
İsa Qəmbər:
- Real müxalifətin birləşməsi mümkündür və arzu olunandır. Özünü müxalifət adlandıran hər kəsin birləşməsi mümkün də deyil, xeyirli də deyil. Özünə müxalifət deyən hər partiya birləşə bilsə hansısa bir konfiqurasiyada bu işə xeyirdən çox ziyan gətirə bilər. Ona görə də biz Müsavat partiyası olaraq real müxalifətin birləşməsinin tərəfdarıyıq və bu istiqamətdə səylər göstəririk.
Xədicə İsmayılova:
- Kimdir real müxalifət?
İsa Qəmbər:
- Onları siz də tanıyırsınız, mən də tanıyıram, hər kəs tanıyır. Bu media mövzusunsan daha çox daxili müzakirələr mövzusudur. Bunlar kateqoriyalardır, terminlərdir. Bu proses davam edəcək.
Xədicə İsmayılova:
- Məni seçiminizə şərik etməyin. Siz kimi real müxalifət olaraq görürsünüz mən onu soruşdum.
İsa Qəmbər:
- Hansı partiyalarla ki birləşmək haqqında danışıram o partiyaları deyirəm. Bu media mövzusu deyil, bu siyasi qüvvələr arasında, bir – birini başa düşən siyasi qüvvələr arasında istifadə olunan terminlərdir. Lazım gələrsə biz bu adları çəkəcəyik, real müxalifət partiyaları birləşəcəyik və bu yolu gedəcəyik.
Xədicə İsmayılova:
- Çox maraqlıdır, bu müxalifətin birləşməsi nə cür şeydirsə bu barədə danışmağa başlayan kimi müxalifət birləşə bilmir. Daha çox parçalanma başlayır müxalifət qüvvələri arasında. Bu niyə belədir?
- Özünü bildiniz ki nə qədər dəqiq ifadə işlətdiniz? Söhbətin canı budur da. Bütün mahiyyət budur ki, hakimiyyət bu mövzuinu komputer virusu kimi cəmiyyətə ötürüb. Və cəmiyyəti inandırıb ki problemlərin həlli yolu müxalifətin birləşməsindən keçir. Müxalifət birləşsə bütün problemlər həllini tapacaq. Problemlər həll olunmasa bunun günahkarı məhz müxalifətin birləşməməyidir. Bax belə bir model, belə bir virus cəmiyyətə ötürülüb və cəmiyyətdə çox təəssüf ki buna inam var. Mən sizə açıq deyim ümumiyyətlə insanlar bir tərəfdən seçim imkanı olmalarını istəyirlər amma bir tərəfdən də orta insan çox seçim istəmir. İnsanlar ağ qara seçim istəyirlər ki asa şəkildə ağı seçib yollarına davam edə bilsinlər. Və belə bir situasiyada Azərbaycanda 4-5 xalqın tanıdığı, bildiyi siyasi qüvvə olsa da hakimiyyətin səyilə, ayrı – ayrı insanların ambisiyaları ilə, xarici qüvvələrin təsirilə onlarla siyasi partiyalar var, siyasi təşkilatlar var. Və onların da əksəriyyəti özünü müxalifət adlandırır. Müxalifətin birliyi tezisi ortaya gələn kimi bütün müxalifət birləşməlidir şüarları ortaya çıxır. Üç qüvvə birləşirsə deyirlər niyə 3-dür beş deyil, 5- i birləşirsə deyirlər niyə on deyil, onu birləşirsə deyirlər niyə iyirmi deyil. Əllisini soruşurlar, əllisi birləşəndə də yüzünü soruşacaqlar. Çünki istənilən vaxt hakimiyyətin imkanı var ki özünün nəzarət etdiyi qüvvələrdən birini sabotaja cəlb etsin. Həm in qüvvə də sabotaj etməklə bildirsin ki bütün müxalifət birləşməyib çünki mən kənardayam. Ona görə də bu oyunlara baş qoşmaq lazım deyil. Xalqın tanıdığı bir neçə real müxalifət qüvvəsi var həmin qüvvələr də bir araya gəlib, birgə seçkilərdə iştirak etməlidirlər. Ən yaxşı model budur. Digər qüvvələr də istəyərlərsə bu qüvvələrlə birgə olmalıdırlar, yanında olmalıdırlar. Yoxsa bu qüvvələrə diktə etməməlidirlər ki, birliyin səbəbi haradadır, birliyin forması nə cürdür və s.
Xədicə İsmayılova:
- “ Gənc bloqçuların həbsi ilə bağlı kəskin bir çıxışınızı görə bilmədik. Bu mövzuyla bağlı nə etməyi planlaşdırırsınız?” Türkiyə türkcəsində belə bir sual gəlib.
İsa Qəmbər:
- Kim soruşur?
Xədicə İsmayılova:
- Adı Uğurdur.
İsa Qəmbər:
- Uğur, gözəl addır adıyla böyüsün. Görməmisinizsə deməli göstərməyiblər. Çünki bloqqerlərlə bağlı ən kəskin çıxışları bəlkə də biz etmişik. Müsavat partiyasının rəhbərləri ediblər. Bloqqerlərin həbsinin səhəri günü toplantı keçirildi, həmin toplantıda mən çıxış etdim.
Xədicə İsmayılova:
- Xatırlayıram
İsa Qəmbər:
- Xatırlayırsınızsa obyektivliyi burada nümayiş etdirin və bildirin ki Müsavat partiyası etiraz nümayiş etdirib.
Xədicə İsmayılova:
- Siz niyə sizə ünvanlanan suallara mənim cavab verməmi istəyirsiniz?
İsa Qəmbər:
- Çünki mən hesab edirəm ki demokratik dəyişikliklər tərəfdarı olan qüvvələr saxta obyektivlik donuna girməməlidirlər. Çünki bu dəqiqə Əliyev rejimi mövcuddur və demokratik qüvvələr var, Müsavat da bu demokratik qüvvələrdən biridir. Və qüvvələr arasında müqayisədən söhbət gedəndə demokratiyanı, dəyişiklikləri istəyən qüvvələr mövqelərini müəyyənləşdirməlidirlər. Saxta obyektivlik adı ilə ortada dayanmamalıdırlar. Müxalifət deyəndə ki qatıq ağdır və hakimiyyət deyəndə ki qatıq qaradır bu obyektib şərhçilər, politoloqlar, ekspertlər nə bilim nələr nələr deməməlidirlər ki qatıq bozdur. Deməlidirlər ki qatıq ağdır. Yaxud əgər müxalifət səhv edirsə deməlidirlər ki müxalifət səhvdir. Kimisə demokratik qüvvələrə bu cür yalan bəlkə də qərəzli adam deyil eşitməyib haradan görsün televiziylar məhdud, qəzetlər məhdud. əgər görməyibsə, eşitməyibsə də siz ki görmüsüz. Təsdiqləyirsiniz burada.
Xədicə İsmayılova:
- Dedim ki xatırlayıram. Amma istənilən halda sizə ünvanlanan sualları cavablandırmaq niyyətim yoxdur. Öz işinizi özünüz görün xahiş edirəm.
İsa Qəmbər:
- Özümüz görəcəyik, amma niyə mediaya hücumlar olanda istər Azadlıq radiosu olsun, jurnalistlər olsun, qəzetlər olsun siyasi partiyaların onları müdafiə etməsini hamı gözləyir, biz də bu müdafiəni edirik, amma siyasi qüvvələrə özü də həqiqi demokratik qüvvələrə, demokratiya uğrunda illərlə mübarizə aparan insanlara böhtanlar səslənəndə, hücumlar olanda media nümayəndələri deyirlər ki biz qarışmırıq, biz mediayıq, biz obyektivik, siz özünüz cavab verin.
Xədicə İsmayılova:
- İsa bəy, məncə elə media obyektiv olsa yaxşıdır.
İsa Qəmbər:
- Dediyim obyektivlik, yəni qatıq ağdırsa ağ desinlər, qaradırsa qara desinlər, deməsinlər ki qatıq bozdur.
Xədicə İsmayılova:
- Yaxşı olar desinlər ki, İsa bəy deyir ki qatıq bu rəngdədir, İlham Əliyev də deyir ki qatıq digər rəngdədir, rəngini özünüz deyəsiniz.
İsa Qəmbər:
- Deməli “Azadlıq radiosu” o fikirdədir ki qatığın rəngini İsa Qəmbərlə İlham Əliyev müəyyənləşdirəcək, siz bilə bilməzsiniz.
Xədicə İsmayılova:
- Mənim siyasi iddiam yoxdur.
İsa Qəmbər:
- İnanaq, 100 faiz?
Xədicə İsmayılova:
- Ciddi deyirəm. Elmira yazır “ biz 70 il gözləmək fikrində deyilik. İsa bəy bir az fəal olsa biz birləşməyə hazırıq”. “ İsa bəy azadlıq hərəkatında heç adları sanları olmayanlar necə oldu hakimiyyəti zəbt etdilər”. Səyyaf yazır Gədəbəydən. “Bu hakikmiyyətə həqiqətən də müxalifət lazım deyil, çünki korrupsiya və monopoliya bunları yıxacaq”. Xalid İbrahimli yazır, “ İsa bəy parlament seçkilərindən nə gözləyir, amma səmimi. Bir də mümkünsə real müxalifət deyəndə kimləri nəzərdə tutur”.
İsa Qəmbər:
- Eyni suallar təkrar – təkrar gündəmə gəlir.
Xədicə İsmayılova:
- Cavab verməyənə qədər yəqin ki gündəmə gələcək.
İsa Qəmbər:
- Mən də o Məcnunlardan deyiləm. Nə zaman lazım biləcəmsə o zaman cavab verəcəm suala. Elmira xanıma təşəkkür edirəm o fikirlərinə görə. Mən əminəm ki bu belədir. Mən əminəm ki biz mübarizənin növbəti mərhələsini başladanda və cəmiyyətə mübarizə üçün birbaşa çağırışlar edəndə mən əminəm ki cəmiyyətin önəmli bir hissəsi mübarizədə iştirak edəcək. Səyyaf bəyin sualına cavab, yadınıza salıram, Rusiyanın İranın və bəzi digər qüvvələrin dəstəyi ilə hərbi çevriliş həyata keçirdilər və hərbi çevrilişin nəticəsində hakimiyyətə gəldilər. Sizin sualınızın cavabı bu qədər bəsitdir. Daxildəki bəzi siyasi qüvvələr də təəssüf ki ya başa düşmədiklərindən ya da elə xarici qüvvələrin oyuncağı olduqlarından ssenariyə dəstək verdilər, kömək etdilər. Bu yolla da Azərbaycanda milli demorkatik hakimiyyət süqut etdi, Əliyev rejimi formalaşdı.
Xədicə İsmayılova:
- “İsa bəy hazırkı tərkiblə Mərkəzi Seçki Komissiyasının seçki saxtakarlığına yol verməyəcəyi halda seçkinin nəticələrini tanıyacaqsınızmı? Yox, əgər seçkinin saxtalaşdırılmasından şübhəniz varsa onda seçkiyə qatılmanız hansı məntiqə sığır?”,
İsa Qəmbər:
- Sual iki hissədən ibarətdir. Birinicisinə cavab olaraq deyim ki, Azərbaycanda Əliyev hakimiyyətindən bəri ilk dəfə normal seçki keçirilib, səslər doğru sayılanda Müsavat partiyası qalibləri təbrik etməyə hazırdır. Bu qaliblər müsavatçı olacaq, yoxsa başqa siyasi qüvvə olacaq bundan asılı olmayaraq bizim üçün önəmli olan demokratik seçkidir. Necə ki, bu gün Ukraynada demokratik seçki keçirildi. Ola bilsin ki qalib gələn şəxs, qalib gələn siyasi qüvvə bizi o qədər də qane etməsin, amma bu Ukrayna xalqının bu gün 2010- cu il fevralın 7-də olan seçimidir. Bu o deməkdir ki, Ukraynada artıq total saxtakarlıq, hakimiyyətin zorakılıq yolu ilə saxlanması olmayacaq. Azərbaycan üçün də biz bunu arzulayırıq. O ki qaldı sualın ikinci hissəsinə, bəli biz seçkidə iştirak etmək fikrindəyik, sizin sualınıza da iki hissədən ibarət cavabım var. Əvvəla, əgər biz seçkiyə qatılmayacağıqsa, cəmiyyət seçkiyə qatılmaycaqsa, seçki haradan fəal ola bilər? Biz mübarizə aparmalıyıq ki seçki demokratik olsun da.
Xədicə İsmayılova:
- Amma prezident seçkiləri öncəsi qərar başqa idi.
İsa Qəmbər:
- O mərhələnin başqa məntiqi var idi. O mərhələdə biz gördük ki, artıq seçkini demokratikləşdirmək mümkün deyil, baykot qərarı verildi. Bu gün mən əminəm ki Azərbaycanda parlament seçkisini yüzdə yüz olmasa da başqa cür demokratikləşdirmək mümkündür. Bu yolda mən mübarizə aparıram. Partiyamla, silahdaşlarımla, yoldaşlarımla birgə. Mən inanmaq istərdim ki, cəmiyyətin bir hissəsi ilə birgə biz bu mübarizəni aparacağıq. Biz nə qədər prinsipial, fəal mübarizə aparsaq seçkilərin seçkiyə oxşaması ehtimalı da bir o qədər artacaq.
Xədicə İsmayılova:
- Bir sual da var idi ki, sonuncu parlament seçkilərindən bəri partiyanızın say tərkibi nə qədər artıb azalıb?
İsa Qəmbər:
- Bilirsiniz yəqin ki burada ziddiyyətli məqamlar ola bilər. Ola bilsin ki partiyanın üzvlərinin sayı formal olaraq artıb. Çünki partiyadan gedənlərsin sayı tək – tək ölçülür. Gələnlərin isə sayı onlarladır. Hər gün, hər ay partiyaya gələnlərin sayı barədə məlumatlar, hesabatlar mərkəzə daxil olur. Yəni say artıb. Ancaq yəqin bunu da qeyd etmək lazımdır ki fəallıq azalıb. Müsavatçıların önəmli bir hissəsi iqtisadi səbəblərdən Azərbaycanı tərk edib gediblər. Avropa ölkələrində, Rusiyada, Ukraynada başqa ölkələrdə çalışırlar ki bir tikə çörəkpulu qazanıb, özlərini, ailələrini dolandıra bilsinlər. Müəyyən bir qismi burada bir tikə çörək uğrunda mübarizə edirlər. Və gündəlik bu həyat mübarizəsindədirlər və siyasi mübarizəyə, Müsavat partiyası ilə birgə siyasi mübarizəyə zamanları qalmır. Formal olaraq sayımız artıb, amma fəallıq göstərənlərin sayı 2005- ci ildəkindən azalıb. Amma bu mənim 8 fevrala dediyim sözdür. Mən əminəm ki yayda xüsusilə də parlament seçkiləri ərəfəsində təkcə formal olan üzvlərimizin sayı yox həm də fəallıq göstərən üzvlərimizin sayı çoxdur.
Xədicə İsmayılova:
- Bayaq bir ifadə işlətdiniz, hansını ki həmin anda sözünüzü kəsib sual vermək istəmədim. Belə bir ifadə var idi ki, vaxtında getmək və dəyişiklik etmək haqqında danışırdınız. Amma tez- tez postunu qoyub gedənlər arasında müxalifət liderlərinin də adı çəkilir. Bu niyə belədir?
İsa Qəmbər:
- Bunun hər halda Müsavat partiyasına aidliyi olmamalıdır mən bilən. Çünki Müsavat partiyası yarandığı gündən 100 il ərzində Azərbaycana həmişə demokratik ideyalar və demokratik praktika gətirib. Biz də gücümüz çatan qədər bu praktikanı inkiışaf etdirməyə, ideyanı inkişaf etdirməyə çalışırıq. Məsələn, Azərbaycanda ilk dəfə parlament seçkilərinin keçirilməsi üçün praymeriz keçirilməsi Müsavata aiddir.
Xədicə İsmayılova:
- Ondan sonra o qədər yazılar getdi ki mediada orada saxtalaşdırılmanın olması barədə.
İsa Qəmbər:
- Heç bir saxtalaşdırma olmayıb. Özünüz də bunu gözəl bilirsiniz. Sadəcə olaraq ilk dəfə idi keçirilirdi. O vaxt praymeriz keçiriləndən sonra narazılıqlar oldu. Biz də narazılıqları əvvəlcədən görüb komissiya yaratmışdıq ki narazı olanlar komissiyaya müraciət edin. Amma heç kim rəsmən müraciət etmədi komissiyaya. Çünki hamı bilirdi ki araşdırma olanda seçkinin yüksək səviyyədə keçirilməsi sübut ediləcək.
Xədicə İsmayılova:
- İsa Bəy, Məzahir Pənahov dəqiqliklə bu sözləri deyir, Azərbaycanda keçirilən seçkilər barədə.
İsa Qəmbər:
- Onda siz Məzahir Pənahovla mənim aramda fərq görmürsünüz. Bu mənim problemim deyil.
Xədicə İsmayılova:
- Bəlkə mən sizdən fərqli olaraq İsa bəy, insanları yox onların dedikləri fikirləri müqayisə etmək istəyirəm.
İsa Qəmbər:
- İnsanlar axı təkrar – təkrar fikirlər səsləndirdikcə onların praktikaları olduqca insanlar onların praktikaları ilə fikirləri arasında ziddiyyətləri görə bilir.
Xədicə İsmayılova:
- Siz hesab edirsiniz ki Məzahir Pənahova Məzahir Pənahov olduğu üçün inanmayaq amma İsa Qəmbərə İsa Qəmbər olduğu üçün inanaq?
İsa Qəmbər:
- Ömrümdə birinci dəfədir ki məni Məzahir Pənahovla müqayisə edirlər onu da xanımlığınıza bağışlayıram. Çox sağ olun. Praymeriz ən demokratik üsuldur namizədləri müəyyən etmək üçün. İstər parlament seçkiləri olsun, istər prezident seçkiləri. Müsavat partiyası ilk dəfə bunu tətbiq edib. Müsavat partiyası öz nizamnaməsində də qeyd edib ki yerlərin ən azı 25 faizi qadınlara verilməlidir. Bu da qadınları fəallaşdırmaq, siyasətə cəlb etmək üçün düşünülmüş bir şeydir. \
Xədicə İsmayılova:
- Neçə ildir Müsavat başqanısınız?
İsa Qəmbər:
- İlk dəfə Müsavat partiyası 2001 – ci ildə qurultayında mənim təşəbbüsümlə nizamnaməyə dəyişikliklər edib ki bir şəxs iki dəfədən artıq partiyaya rəhbərlik edə bilməz. Eyni şəxs iki dəfədən artıq partiya rayon təşkilatların sədri ola bilməz və s. İndi 2010- cu ildə o müddət çatır və mən namizədliyimizi verməyəcəm.
Xədicə İsmayılova:
- Yaşayarıq, görərik
İsa Qəmbər:
- Bu da demokratikləşmə sahəsində Müsavatın Azərbaycan cəmiyyətinə göstərdiyi növbəti nümunədir.
Xədicə İsmayılova:
- Etibar Məmmədov vaxtilə partiyasını tərk etdi və ondan sonra partiyasının fəaliyyəti o qədər də gözə görünmür. Qorxmursunuz ki partiyanızın da başına eyni şey gələr?
İsa Qəmbər:
- Qətiyyən. Fərqli situasiyalardır. Həm də Müsavat partiyası başqa partiyalardan fərqli olaraq şəxs ətrafında yaranmış partiya deyil. Müsavat partiyası ideya ətrafında yaranmış bir partiyadır. Və 100 ildir ki fəaliyyət göstərir. ən mürəkkəb situasiyalardan keçib. Və heç bir çətinlik partiyanı zəiflədə bilməz. Bu məsələnin tarixi tərəfidir. Məslənin praktiki tərəfinə gəldikdə isə etiraf edək ki Azırbaycanda bəzi siyasi partiyaların liderləri həmin partiyadan getsələr də həmin partiyaya normal bir sədr seçilməsinə imkan vermirlər. Həmin partiyanın müstəqil bir sədrin seçilməsinə də partiyanın seçilmiş sədrinin özünü o partiyanın doğurdan da müstəqil sədri kimi hiss edib, partiyanı idarə etməsinə imkan verməyiblər. Təbii ki biz imkan verəcəyik.
Xədicə İsmayılova:
- Və ona görə də mən sual verməyəcəm ki kimi özünüzdən sonra Müsavata lider görürsünüz.
İsa Qəmbər:
- Mən bu barədə suallara cavab vermişəm ki Müsavatda varislik prinsipi şəxslərə deyil ideyalara aiddir. Varislər Müsavat ideyasına, Rəsulzadə, Elçibəy ideyalarına sadiqdirlər və inşallah olacaqlar da.
Xədicə İsmayılova:
- Cavabı olmayan bir sual var dinləyicidən, “ Ay İsa bəy, Azərbaycan hara gedir”, Xalid İbrahimli yazır ki, “Təəssüf ki, və yenə də təəssüf bu tək məni yox ümumi cəmiyyəti narahat edir. Konkret adlar çəksəniz bu ümumi ittihamlardan daha yaxşı olar. Cəmiyyət bundan daha çox şey götürər.”
İsa Qəmbər:
- Xaliq İbrahimli adından istifadə edən dinləyiciyə tövsiyyəm odur ki, bir qədər diqqətli olsun. Azərbaycanda siyasəti izləyən heç kəsə sirr deyil ki, kim kimdir, kim real müxalifətdir, kim saxta müxalifətdir.
