NOTASIYA
e2 - e4
Bir də baxıb gördün ki,
sənin bu boyda dünyada
40 yaşdan savayı heç nəyin yoxmuş.
e7 - e5
Bu qırx yaş da səninçin
yalnız rəqəm kimi maraqlı.
Rəqəmlər sənə çox doğma, sox yaxın-
körpəlikdə danışmağı
saymaqla öyrənməsən axı.
At g1 - f3
Evdə divardan asdığın təqvimin də
səninçin zaman əhəmiyyəti yox.
O, səninçin təqvim deyil ki,
sadəcə sevdiyin rəqəmlərin şəklidi.
d7 - d6
Elə hey düşürsən…
Deşilib boşalır iddiaların,
göydən düşürsən.
Elə hey düşürsən…
Gözdən, ruhdan, həvəsdən,
heydən düşürsən.
İndi düşmək səninçin
yeganə mümkün hərəkət forması.
Fil f1 - c4
Kənddə doğulub böyüdüyün eviniz
uçulub-sökülmüş indi.
O evdən hamı və hər şey dağılışıb getmiş.
Ancaq uşaq vaxtı dişləyib atdığın qəndin
başına yığışan qarışqalar hələ də ordadı.
Fil c8 - g4
İndi neynirsən bu şəhərdə,
neynirsən?!..
Gündüzlər təlim maşınında gəzib
yol hərəkəti qaydalarını öyrənirsən,
axşamlar isə balaca otağında
gərdiş eləyirsən «əlil arabasında».
At b1 - c3
Heç bircə saat da məhbəs görməyən
adamda bu nə azar ki,
hər şeyə barmaqlıqlar arasından
baxmağa həvəskarsan.
hətta torpaq da səninçin
ayaq barmaqlarının arasından
göründüyü qədərdi.
At g8 - f6
Evində iki pəncərə var. Onlardan biri…
Məhz onu siqaret tüstüsünün
çıxmasıyçun açırsan.
Açmasan belə, siqaret tüstüsü
həmişə çıxdığı yerə öyrəşmiş kimi
çəkilib yığışır məhz həmin pəncərinin qabağına.
Qalaqurma
Bir də binanın damındakı o «tanış» antenna.
Ötürdüyü dalğaları görmək arzusuyla
aşağıdakı «balkona» həsrətlə əyilmiş.
At f6 : e4
Belədi də, bütün ayrılıqlar belədi-
səs sürətiylə çıxıb gedir,
tabut sürətiylə qayıdırsan.
Elə mühacirlər də öz vətənlərinə
xalçadan qaçmış ilmə kimi bağlı.
At f3 : e5
Baxıb düşünürsən:
döşəmə boyu fikirli-fikirli
gərdiş eləyən bu kişinin
və tavan boyu ora-bura qaçan bu milçəyin
nə dərdi var görəsən?
Bax elə bu anda Allahın bu iki canlısının
nə fərqi var görəsən?..
Fil g4 : d1
Bir də bu milçəkqıran…
Adamlar o qədər aciz ki,
bir milçəyi öldürməkçin də silaha əl atırlar.
Fil c4 : f7 (şah!)
Düzdü, deyirsən də…
İş uçmaqda deyil ki
qəfəsdəki quş göy üzünə baxa bilirsə
deməli azaddı.
Sözdü deyirsən də…
Şah e8 - e7
Vaxt gələcək…
bir zamanlar kiməsə barmaq silkələdiyin,
gedən bir qadının arxasınca yellədiyin
əllərin qocalıb əsməyə başlayacaq.
Bir zamanlar işarələrlə dil-dil ötən əllərin
indi topuq çalacaq.
Əldən pəltəklik daha dəhşətli.
At c3 – d5 (mat)
Və vaxt gələcək…
yol qırağında tapılmış
naməlum kişi meyidi olacaqsan,
«tanımağa» bir kimsə gəlməyəcək.
bsu-kitab@mail.ru
