Məscidin içində Allahı axtardım... (Seçmə şeirlərdən)

-

Bu şeirlər son həftələrdə "Oxu zalı"na göndərilmiş əsərlər arasından seçilib. Bütün əsərlər müəllifi göstərilmədən Münsifə göndərilib.


Günel Eyvazlı


Ehramlar-insanlar…

Bax,
Dağları necə tikir insanlar,
Səhrada sıralanıb ətəyi gen
Ehramlar.

Bəlkədə göydələnlər
Allaha çatmaq üçündür,
Babil qülləsi kimi...

İndi gözünə eynək taxırsan,
Başına keçirdiyin papaq,
Üzündə saqqal,
Kimdən gizlənir insanlar?

Başına hicab keçirən qadın,
Dilənirdi.
Əl açırdı maşınlara.
İnanmıram hicab taxan qadınlara.
Bəlkə buna çalışırlar?
İnamsızlıq.

Məscidin içində Allahı axtardım...
Mütəkkə gördüm, Molla gördüm.
Evə gəlib özümdə tapdım səni,
Bu qədər yaxın ikən,
Uzaqda axtardım səni.

Hər şeyin zahirinə aldanırıq.
Saqqalına, örtüyünə.
Artığına, əskiyinə.

Mənsə sənə inanıram,
Özümə bənzəyən adam...


Bu qədər.

Yunusu udan balıq,
Sahilə qaytardı onu,
Bu da tarix qarşısında
Sahillərin xoşbəxt sonu.
Tək bir dəfə.

Lutu obasından didərgin saldı,
Qövmü.
Hər daş üzərində adı yazılaraq
Məhv oldular...

Bu qədər yazdıq, yazdıq
Kimi məhv edəcək kağız?
Qaranlıqdır.

Sözlər ilahidir deyirlər,
Danışmayın.
Bəlkə susaraq çox şey ifadə etdi,
Gözlərimiz.
O da korsa...

Sapı iynənin gözündən keçirməyi
Bacarmayan qoca nənəm,
Mənki sənin gözlərinəm.

Bir kibriti alışdıracaq qədər,
Güclü deyil qolların.
Bir insanı mutlu edəcək qədər,
Şəfalıdır sözlərin.
O da lalsa ...

Mən,
Hər ayna qarşısından keçəndə,
Özümü görürəm,
Səni görmək ümidilə...