Arif Alışanov «Azərbaycan Televiziya və Radio Verilişləri» Qapalı Səhmdar Cəmiyyətinə (QSC) sədr təyin edildi. Bu barədə prezident İlham Əliyevin avqustun 16-da imzaladığı sərəncamda deyilir.
Arif Alışanov bu vaxta qədər AzTV-də sədrin televiziya məsələləri üzrə müavini işləyib. Nizami Xudiyev tutduğu vəzifədən azad ediləndən sonra o, sədrin səlahiyyətlərini də icra edirdi.
Bu il iyunun 27-də prezidentin imzaladığı sərəncamla Nizami Xudiyev «Azərbaycan Televiziya və Radio Verilişləri» Qapalı Səhmdar Cəmiyyətinin sədri vəzifəsindən azad edildi. Cənab Xudiyev 1996-cı ildən bu vəzifədə çalışırdı.
Prezident İlham Əliyevin avqustun 16-da imzaladığı digər sərəncamla isə Abutalıb Səmədov Müəllif Hüquqları üzrə Dövlət Agentliyinin rəhbəri təyin edilib. Kamran İmanov isə tutduğu vəzifədən azad edilib.
Sabiq millət vəkili olmuş Abutalıb Səmədov indiyə qədər iqtidaryönlü Azərbaycan Naminə Alyans Partiyasının sədridir.
