«QHT sektorunu maliyyələşdirən donorlar şəffaf deyil»
Azay Quliyev: «QHT sektorunun maliyyəsinin təqribən 35 faizi, yəni 23,5 milyon manatı xarici donorlardan gəlir. Bu donorların fəaliyyəti isə şəffaf deyil, eyni zamanda, Azərbaycanda sabitlik və təhlükəsizlik üçün bir təhdiddir. Bu baxımdan QHT-lərin xarici donorlardan asılılığının tam aradan qaldırılması üçün tədbirlərin görülməsi vaxtı çatıb».
Azay Quliyev təklif edir ki, Azərbaycan Prezidenti yanında QHT-lərə Dövlət Dəstəyi Şurasının büdcəsi artırılsın. O, ilkin mərhələdə Şuranın büdcəsinin 10 milyon manatadək artırılmasını təklif edib.
Milli Məclisin sədri Oqtay Əsədov da A. Quliyevin təklifini müsbət qiymətləndirib və Şuranın büdcəsinin artırılmasını məqsədəuyğun hesab edib.
«Biz məktəbdə oxuyanda...»
Deputat Jalə Əliyeva məktəblərdə bilet satışının ləğvindən narahatlığına dilə gətirib:
«Biz məktəbdə oxuyanda simvolik bir məbləğdə teatra bilet verirdilər. İndi bu ənənə aradan qalxıb. Mənə dedilər ki, səbəbsiz yerə məktəblərdə pul yığılmasının qarşısını almaq üçün daha məktəblərdə bilet satmırlar. Məncə, büdcədən cüzi məbləğdə vəsait ayıra bilərlər ki, uşaqların mədəni zövqü məktəbdəykən formalaşsın».
Milli Məclis 2015-ci ilin dövlət büdcəsinin müzakirəsi ilə davam edir.
Fəzail Ağamalı: «Kənd təsərrüfatının inkişafına xüsusi diqqət verilməlidir. Aqrar sahədə sənaye istehsalının stimullaşdırlması ilə bağlı güzəştlər tətbiq edilməlidir. Daxili bazarın qorunması üçün müvafiq addımlar atılmalıdır. Mən bankların kredit siyasətinə də toxunmaq istəyirəm. Deyirlər ki, əhalinin çoxu, 5 milyon adam kredit borcuna girib. Kommersiya banklarının verdiyi kreditlərin faiz dərəcələri çox yüksəkdir. Faizlərin aşağı salınmasına ciddi ehtiyac var. Bəlkə, faizlərin aşağı salınması üçün Mərkəzi Banka əlavə səlahiyyətlər verək, bunun üçün lazımdırsa, qanunveciliyə dəyişiklik edək. Bəlkə bu yolla insanları kommersiya bankının nəhəng mədəsindən xilas edə bilək».
«Neftsiz ölkələr büdcəni necə formalaşdırırlar?»
Fərəc Quliyev: «Neft Fondu rubla da investisiya yatırıb. Amma rublun dəyəri aşağı düşür. Belə getsə, yəqin bu cür də qalacaq. Rubla qoyulan aktivlərimiz əriyəcək. Elə bilirəm ki, Neft Fondunun rubl siyasətinə redaktələr edilməlidir».
Fərəc Quliyev təklif edir ki, büdcənin neft gəlirlərindən asılılığını azaltmaq üçün ciddi tədbirlər görülməlidir: «Neftsiz ölkələr var, onlar büdcəni necə formalaşdırırlar?»
O, yaşayış minumumunun ehtiyac meyarına uyğunlaşdırılmasını təklid edir. Deyir ki, hazırki yaşayış minimumu adekvat deyil.