Mitinq başlandı
AXCP Gənclər Komitəsinin sədri Əbülfəz Qurbanlının açılış nitqindən sonra dövlət himni səsləndirilib.
Etirazçılar əllərində “Manatın qatilləri cəzalandırılsın”, “8 milyard pul veriblər, oynamaqlarına bax”, “Seçki saxtakarlığına son” və digər şüarlar yazılmış plakatlar tutublar.
Mitinqin tribunasında Milli Şuranın sədri Cəmil Həsənli və AXCP sədri Əli Kərimlidir.
Ə.Kərimli çıxışında bildirib ki, hakimiyyət, hüquq-mühafizə orqanları mitinqə gəlmək istəyənlərə maneələr yaradıb. O həmçinin bildirib ki, həkimi, müəllimi 200-300 manat alan bir ölkəyə Avropa Oyunlarının keçirilməsi lazım deyil.
Müsavat partiya olaraq mitinqə qatılmır
Müsavat başqanının müavini Elman Fəttah APA-ya açıqlamasında deyib ki, hər bir müsavatçı Milli Şuranın martın 15-nə təyin etdiyi mitinqə qatılıb-qatılmamaqda sərbəstdir. Müsavat partiya olaraq aksiyada iştirak etməyəcək:
"Milli Şura mitinqi özü təyin edib və mitinqdə iştirak etmək üçün heç bir partiyaya müraciət etməyib. Ona görə də, mitinqdə iştirakla bağlı heç kimə tapşırıq vermirik, bunu üzvlərin öz öhdəsinə buraxırıq. Kim istəsə mitinqə qatıla bilər”.
"İnsanların son tikəsini də əllərindən alırlar"
Milli Şura Kordinasiya Mərkəzinin üzvü, istiqlalçı deputat İbrahim İbrahimli deyib ki, "Bir gecədə milli valyutanı ucuzlaşdıranların məqsədi insanların min bir əziyyətlə yığıb-topladığı son tikəsini də əlindən almaqdır".
Bu barədə "Azadlıq" qəzeti yazır.
Milli Şura üzvü Vahid Məhərrəmovun fikrincə, artıq hiss olunur ki, hökumət idarəetmədə çətinlik çəkir: “Bu qədər neft gəlirləri hansı istiqamətə xərclənir? Niyə bu qədər işsizlik problemi, bahalaşma yaşayır bu xalq?"
Mətbuat Şurası "Talana yox" mitinqində monitorinq aparcaq
Milli Şuranın martın 15-də Bakıda keçirəcəyi mitinqdə jurnalistlərin peşə vəzifələrini necə yerinə yetirmələrinin monitorinqi aparılacaq.
“Qafqazinfo”nun məlumatına görə, monitorinqi Azərbaycan Mətbuat Şurasının Daxili İşlər Nazirliyi ilə birgə yaratdığı monitorinq qrupu aparacaq. Onlar jurnalistlərə peşə fəaliyyətlərini yerinə yetirmələri üçün yaradılmış şəraiti nəzərdən keçirəcəklər.
Milli Şuradan Oqtay Gülalıyev AzadlıqRadiosuna deyib ki, bu barədə onlara heç bir məlumat daxil olmayıb.
Milli Şura martın 15-də «Talana son» şüarı ilə aksiya keçirməyi planlaşdırır.