-
Şəhriyar del Gerani yeni çapdan çıxan “darıxmağın adı” kitabını təqdim etdi.
Kitabın təqdimatı mayın 16-da Azərbaycan Yazıçılar Birliyinin qarşısında keçirilib.
Kitabda Şəhriyar Del Geraninin son dövrlər yazdığı şeirləri və esseləri toplanılıb. Ön sözün müəllifi Vaqif Bayatlı Odər, redaktor Seyfəddin Hüseynlidir.
Təqdimatda Əkrəm Əylisli, Sabir Rüstəmxanlı, Səlim Babullaoğlu, Baba Vəziroğlu və b. iştirak ediblər.
Müəllif bildirib ki, "Darıxmağın adı" kitab dükanlarında satışda olmayacaq. Əsər yalnız təqdimat günü satılacaq.
.Şəhriyar del Gerani
YENİ KİTABDAN ŞEİRLƏR
***
hamının
deyirəm ki
hamının işi ola bilməzdi
bu boyda
qos-qoca divanə boşluq
olsa-olsa bir nəfərin yoxluğu yarada bilərdi bunu
deyirəm ki
yalnız bir nəfərin yoxluğundan yaranıbdı bu boşluq
təkrarlanmır heç nə
bilirsinizmi
hər gün-hər gün eyni yerdən çıxmır günəşlər
hər gün-hər gün eyni küləklərlə yellənmir uşaq
paltarları asılmış zivələr
bilirsinizmi
illərdi burulduğumuz döngələr də heç eyni
küçəyə çıxmır
deyirəm ki
illərdir burulduğumuz küçələr eyni adamlara
aparmır bizi
niyə başa düşmürsüz axı
həmin o bir nəfərsiz ömür - yaşamaq deyil
hər gün bir az daha artıq sağ qalmaq
cəhdləridi
deyirəm ki
həmin o bir nəfərsiz ömüü...r
həmin o
bir nəfərsiz
ömür
həmin
o
o bir nəfər
həə
onsuz
deyirəm ki
onsuu..z, onsuz
onsuz
OLMUR!..
riyazi sevgilər…
daha çox məişət hadisəsiymiş
fəsillərin dəyişməsi
bilirəm
daha heç vaxt yaşıllaşmaz ağaclar
günəşli yağışlar da yağmaz
daha bir də
yaz gəlməz bu yerlərə
inan mənə
belə getsə
heç, qış da çıxmaz
düşünmək – ucadan susmaqdı
bəzən, ucsuz-bucaqsız darıxmaqdı indiki zaman
indi mən
hamının unudulduğu yerlərdən susuram
susuram ki
daha yaxşı eşidəsən kimi itirdiyini
uzaqlar - yolların romantikasıydı
sən də gedib qoşuldun bütün tərəflərimin
uzağına
təkcə yanınızdan deyil
hər yerinizdən gedirsə - sevgidir
mən sizə demişdim axı
riyaziyyat həmişə səhv edir
ikidən bir çıxanda yerdə heç kəs qalmır...
indi mən
hamının getdiyi yerlərdən susuram
susuram ki
daha yaxşı eşidəsən suyun ayaq səslərini...
Ki
biz
gözəl günəşlərin xatirinə içdik gecələri
qızım
bəsdi
get allahdan bağışlanmaq istə
de ki
bizə günəş göndərsin
de ki
bizə günəş göndərsin
o günəş ki
içərkən baxıb utanaq
aldadarkən unudulaq
kilsələrdə məhəmmədi
məscidlərdə isanı düşün
dənizdə ölsən balıqları
torpaqda ölsən qarışqaları doyduracaqsan
əgər allah varsa
hamımızın
yoxdursa
heç birimizin deyil, qızım
biz
gözəl günəşlərin xatirinə içdik gecələri
ki
kimdəsə
ki
necəsə unudulaq
uzaq dur qızım
uzaq dur xoşbəxt olaq...
dekabr şeiri
nə uzaq küçələr vardı uşaqlığımızda
nə uzaq şəhərlər oldu sonralar
böyüdükcə dəyişir uzağlar da
küçələr də
küçə-küçə
şəhər-şəhər uzağ olur adamlar
sən də bir küçə seç getməzdən öncə
bir şəhər şeç unutmağa
bir uzağ seç darıxmağa
sən də getməzdən öncə
bir az dəyiş
bir az uzağ ol
sonra get
bu qədər yaxşıykən getmə, noolar
bilirsənmi
çətin olur yaxşıların gedişi...
ən sonuncu dostum da oğraş çıxmamış
bilirsənmi
axşam düşməmiş
şər qarışmamış getmə
çətin olur
yağışlarda son görüş
parklarda skamyalar qurumamış getmə
sən bilmirsən
çətin olur payızlarda darıxmaq
ən sonuncu yarpaqlar da düşməmiş
torpağa qarışmamış
bir az qal, noolar
getmə qış çıxmamış
qış çıxmamış getmə...
sən bilmirsən
indi mən allahdan nə üçün yox
kiminçün yaradıldığımı soruşuram.
bir az da səbrin olsun,
məni ömrümün sonuna ötür,
sonra get.
sən bilmirsən
indi mən, adamlarçün yox
əşyalarçün darıxıram
bir az da səbrin olsun
qəbrim üstən yaylığını götür
sonra get
daha mən, gələcəkdən yox
keçmişdən nigaranam
bir də gördün heç kəs yadına düşmür
indi sənə qal deməyim
səninlə bütün keçmişlərdə
yanaşı görünmək istəyimdi
arzular da canavar kimidi... əhilləşmir!
səndən sonuncu istəyim
məni xatırlasan
kimsəsiz, boş qalmış
otaq kimi xatırla
səndən sonuncu istəyim
məni xatırlasan
uzaqlarda qəzaya düşmüş
sərnişinsiz qatar kimi xatırla
heç bilmirəm torpaq suyu içirsə
adamları neynir...
yanvar şeiri
bir gün ağaclar quruyar
bir gün yağışlar yağar
və bir gün çıxıb gedərsən
qollarım quruyar...
mənsə səni soruşaram
hər küçədən ötənnən
ya dükançı Sürəyyadan
ya qonşunun itinnən
Və
sənsiz günəş gecikər
aydınlanmaz sabahlar
azan səsinə diksinər
bu şəhərdə günahlar...
bu səhər də baş ağrısı
soyuq içki, darıxmaq
bircə quru zəngin gələ
deyəsən ki, darıxma...
