Yanğın haqda bütün xəbərlər bir arada

Cinayət işi açılıb

Yanğından sonra Fövqəladə hallar və daxili işlər nazirlikləri və Baş prokurorluq birgə məlumat yayıblar.

Fakt üzrə Baş Prokurorluğun Ağır Cinayətlərə dair İşlər üzrə İstintaq İdarəsində cinayət işi açılıb. Cinayət məcəlləsinin 3 maddəsi əsas götürülüb. Ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma, vəzifə səlahiyyətlərindən sui-istifadə və ağır nəticələrə səbəb olan səhlənkarlıq maddələri ilə cinayət işi başlanıb.

Yanğında ölənlərin çoxu tüstüdən boğulub

Yanğın zamanı mənzillərində qalıb kömək gözləyənlərin 80 faizi sağ qalıb, bloka çıxanlar isə tüstüdən boğulublar.

Bunu jurnalistlərə fövqəladə hallar nazirinin müavini , general-leytenant Etibar Mirzəyev deyib.

Etibar Mirzəyev bildirib ki, yanğın 4 saatadək davam edib. Yanğının söndürülməsinə cəlb olunan iki helikopter funksiyalarını uğurla yerinə yetirib.

Xəsarət alanlardan 25 nəfəri FHN-in əməkdaşları təxliyə edib. Bütün mənzillər yoxlanılıb, binada heç kim qalmayıb.

Hadisə yerində 40-dan artıq texnika işləyir.

Yanğın zamanı 16 nəfər ölüb, 54 nəfər yaralanıb.

Dəqiq rəqəm - 14 ölü

Səhiyyə Nazirliyi ölənlərin sayının 14 olduğunu bildirir

Mayın 19-da Binəqədi rayonundakı yaşayış binasında baş vermiş yanğında ölənlərin sayı 14 nəfərdir. 50 nəfər isə xəsarət alıb.

Yaralıların hamısı xəstəxanalarda yerləşdirilib, həyatları üçün təhlükə yoxdur.

Bu haqda Səhiyyə Nazirliyinin məlumatında deyilir.

Məlumatda deyilir ki, Səhiyyə nazirinin müavinləri xəstəxanalardadırlar, yaralıların hazırkı vəziyyəti ilə tanış olurlar.

Az əvvəlsə nazirlik ölənlərin sayının 15, daha sonra 16 nəfər olması haqda məlumat yaymışdı.