Polis sarı zolağı izah edir
Bakı şəhər Dövlət Yol Polisi İdarəsinin şöbə müdiri Vaqif Əsədov Azadlıq Radiosunun suallarına cavab verir:
-Gün ərzində müxtəlif yerlərdə, müxtəlif vaxtlarda sarı zolaqlara düşən sürücü mərkəzi məlumat xidməti vasitəsi ilə elektron qaydada tərtib edilmiş protokol əsasında o sayda da cərimə ödəməli olacaq. Sürücü tərəfdən “bilmədim”, “görmədim” kimi işlədilən ifadələr onu məsuliyyətdən azad edə bilməz. Çünki yetərincə təbliğat aparılıb. Hər xətanın özünəməxsus cəzası var. Məsələn, sarı zolağa girib hərəkət etməyin cəzası 40 manatdır. Amma sarı zolaqda hərəkət edənin hərəkətinə maneə yaratmaq bir başqa xətadır. Bu artıq 3 bal 60 manatdır. Yaxud sarı zolaqla kəsişən digər zolaqlar üzrə hərəkətdə olan nəqliyyat vasitəsini kobud yol hərəkət qaydasının pozulması nəticəsində 4 bal, 100 manat cərimədir. Çünki bu artıq qəza şəraitinin yaradılması deməkdir.Ətraflı AzadlıqLive-da
İqtisadçı Rövşən Ağayev Facebook-da yazır
Bunu Üzeyir Bəyin arxivindən "sosial şəbəkələri qapadaq" deyən Mətbuat Şurasının sədrinə ərməğan edirəm... Sadəcə bu məqalədə “qəzet” sözünün yerinə “facebook” yazmaq olar.
Qəzet oxuyan (Felyeton)
Qəzet oxuyan müsəlman qəzetdən məlumat qazanır, biliyi artır. Ona görə “qəzet oxumaq müsəlmana haramdır”. Qəzet oxuyan müsəlman bütün aləmin əhvalından xəbərdar olur. Dünyanın bu başında oturub, a biri başında vaqe olan dürlü-dürlü hadisələri bilir. Ona görə “qəzet oxumaq müsəlmana haramdır”.
Qəzet oxuyan müsəlmanın ağlı artır, dargöz olmur, hər bir işə əqli-səlim nöqteyi-nəzərindən baxır. Ona görə “qəzet oxumaq müsəlmana haramdır”.
Qəzet oxuyan müsəlman öz dərd və ehtiyacını, qardaşının giriftar olduğu müsibət və bəlanı qəzet sütünlarında yazılmış görür, yaxud millətini təhdid edən müsibətlərdən xəbərdar olur. Ona görə “qəzet oxumaq müsəlmana haramdır”.
Qəzet oxuyan müsəlman qəzet sütünlarında dərdinə dərman, ehtiyaclarına əlac, işinə əncam tapır. Qəzet oxuyan müsəlman qəzetdən təsəlliyab olur, qəm və kədəri dağılır, qəmabad könlü təskinlik tapır. Ona görə “qəzet oxumaq müsəlmana haramdır”.
Ona görə müsəlmanlar məlumatsız, biliksiz olsunlar, dünyadan xəbərləri olmasın. Dargöz, ağlı gödək olsunlar, öz dərd və ehtiyacından, qorxulu müsibətindən bixəbər olub, çarəsiz, dərmansız, əncamsız qalsınlar; ürəkləri deşən qəm ələmdən xilas olub, təsəlliyab olmasınlar.
Bunlar hamısı “halaldır”…
"Qoy, Mikayıl Cabbarov yuxarılara desin..."
Tələbə Qəbulu üzrə Dövlət Komissiyasının açıqladığı imtahan nəticələrinə görə, Azərbaycan və rus bölməsi üzrə 31 min 9-cu sinif şagirdinin yarıdan çoxu ana dili və riyaziyyatdan “2” və “3” alıb. Təhsil eksperti Nabatəli Qulamoğlu deyir ki, Təhsil Konsepsiyası hazırlandı, amma bir müddəası da işləmir: “Qoy Mikayıl Cabbarov yuxarılara desin ki, niyə bu Konsepsiyanın bir müddəası da işləmir? Müəllimlərin attestasiyasını keçirdilər, manatın devalvasiyasından sonra cüzi maaş artımı oldu. Amma bilirsiz, bu, yerində qaçmağa bənzəyir, istəyirsən hansı sürəti yığırsan, yığ, yenə də yerində qaçırsan. Keyfiyyətli təhsilə pərakəndə şəkildə nail olmaq mümkün deyil”.
Rəşad Məcid "4" verir
«525-ci qəzet»in redaktoru Rəşad Məcidə görə, vəziyyət elə də dramatik deyil: «Azərbaycan mediası rəngarəngdir, ifadə, söz azadlığının məhdudlaşdırılmasından danışmaq yersizdir. Mən mətbuata bu gün beşlik şkala ilə «dörd» verirəm» - deyir.