Platini Rövnəq Abdullayevdən dəstək istəyir
UEFA prezidenti, keçmiş futbol ulduzu Michel Platini FİFA prezidenti olmaq üçün AFFA-dan dəstək istəyir. O, AFFA prezidenti Rövnəq Abdullayev də daxil, FİFA-ya üzv olan 209 milli assosiasiyanın prezidentləri və baş katiblərinə məktub göndərib: "Mən futbolun və şəxsən özümün gələcəyimi ölçüb-biçərək, dərindən və çox düşünülmüş qərar qəbul etdim. Əlbəttə, bu zaman sizin dəstəyinizi, çoxlarınızın mənə göstərdiyiniz hörmət və etimadı əlimdə rəhbər tutdum. Öz taleyini öz əlinə almağın lazım gəldiyi anlar da olur. Mən belə dövrlərdən birini keçirirəm. Bu, həyatımda və FİFA-nın taleyini müəyyənləşdirən sınaq mərhələsidir". FİFA-da prezident seçkilərində namizədlər arasında Zico, son məlumata görə, Maradona da var. Prezident seçkisi 2016-cı il fevralın 26-dadır.
Telman İsmayılovun otelinə yenə həbs qoyuldu
Azərbaycan əsilli oliqarx Telman İsmayılovun Türkiyənin Antalya bölgəsindəki lüks “Mardan Palace” otelinə yenə həbs qoyulub. Virtualaz.org xəbər verir ki, bu dəfə otelə həbs qərarı “Mardan Palace”dən 2,2 milyon türk lirəsi (təxminən 800 min dollar) borcunu ala bilməyən “Art Décor” adlı şirkətin iddiası ilə çıxarılıb.
Türkiyə mətbuatı yazır ki, “Mardan Palace”dan borclarını tələb edənlərin sayı çoxdur. Hazırda Telman İsmayılovdan borclarını tələb edənlərin sayı 26-dır.
Türkiyənin “Sözcü” qəzeti isə yazır ki, “Mardan Palace” hotelinin borca görə müsadirə olunması haqda Antalya məhkəməsində qərar çıxarılıb.
Qərb mediası Erdoğanı kəskin tənqid edir
«Türkiyənin Suriya və İraqı bombalaması bizə lazım olan ən sonuncu şeydir».- bunu «The Independent» qəzeti yazır. «Türkiyə PKK-nın İraq və Türkiyədəki bazalarını da bombalayır. Bu, İD-ə qarşı beynəlxalq ictimaiyyətin səyləri üçün fəlakətli nəticələr deməkdir. Türkiyə İD-ə qarşı müharibədə əngəl olduğu bir vaxtda, PKK və ona paralel PYD qruplaşması Suriyada İD əleyhinə səmərəli quru müharibəsi aparıb».«PYD Suriyanın şimal-şərqində de-fakto hökumət də qurub ki, bu da Suriya münaqişəsinin uğur hekayətlərindən biridir».
Maşınına "Ata, məni də evləndir" yazan cərimələndi
Ağdamda yol polisi qayda pozan sürücülərə qarşı reyd keçib. "Report" xəbər verir ki, bir sürücü "VAZ 2107" avtomobilinin arxa şüşəsinə "Ata məni də evləndir" yazdığı üçün cərimələnib.