-
Noyabrın 12-dən 13-ə keçən gecə Arif Yunusun səhhəti yenidən pisləşib, təzyiqi yüksəlib.
Bu barədə AzadlıqRadiosuna onun yanında olan psixoloq Azad İsazadə məlumat verib.
Azad İsazadə bildirib ki, Arif Yunus noyabrın 13-də həkim müayinəsindən keçib:
«Həkim müayinəsindən keçməli olduq, çünki təzyiqi yüksəkdir, enmir. Həkim də məsləhət gördü ki, ev şəraitində müalicəsini davam etdirsin».
Tarixçi-alim Arif Yunus səhhətində yaranan problemlərə görə noyabrın 12-də başqa yerə getməmək barədə iltizam alınaraq həbsxanadan buraxılıb.
Qanunsuz sahibkarlıq, vergidən yayınma və digər iqtisadi cinayətlərdə ittiham olunan Arif Yunus bu ilin avqustunda 7 il azadlıqdan məhrum edilmişdi.
Eyni ittihamlarla 8 il 6 ay həbs cəzası alan həyat yoldaşı, hüquq müdafiəçisi Leyla Yunusun növbəti məhkəmə prosesi dekabrın 7-dədir.
Yunusların özləri ittihamları rədd edirlər.
