Ötən il Azərbaycan hökuməti azı 25 jurnalisti, siyasi və gənc fəalı siyasi motivli ittihamlarla, ədalətsiz məhkəmələrlə uzunmüddətli həbs cəzalarına məhkum edib. Bunu “Human Rights Watch” insan haqları təşkilatı yanvarın 18-də açıqladığı “Dünya Hesabatı 2018” adlı sənəddə bildirir.
*** Buna da bax: Freedom House 2018: Demokratiya bütün dünyada geri çəkilir…
“TƏZYİQLƏR DAYANDIRILSIN”
«Qeyri-hökumət təşkilatlarıyla bağlı mürtəce qanunlar və qaydalar müstəqil qrupların fəaliyyətlərinə maliyyə əldə edib onu gerçəkləşdirməsini demək olar, mümkünsüz edib. Polis zorakı kampaniya keçirərək onlarla geyi və transgender qadını həbs edib, yaxud onlarla pis rəftar edib, rüşvət və informasiya almağa çalışıb. Həbsdə işgəncə və pis rəftar edərək cəzasız qalmaq geniş yayılıb və hüquqi dəyişikliklər siyasi həssas işlərə çıxmaq istəyən vəkillərin sayını azaldıb», – hesabatda deyilir.
“Son bir ildə Azərbaycan hakimiyyəti tənqidçilərinə qarşı hücumları davam etdirib, ölkədə müstəqil fəaliyyətin mövcudluğuna təhlükə yaranıb. Azərbaycan bu təzyiqləri dayandırmalı, yanlış həbs olunmuş hər kəsi buraxmalı, müstəqil qrupların müdaxiləsiz fəaliyyətinə imkan verməlidir”, – Human Rights Watch-un Cənubi Qafqaz direktoru Giorgi Gogia deyib.
*** Buna da bax: Azərbaycan 'azad olmayan' ölkə sayıldı – reaksiyalar
Qurum sayca 28-ci olan 643 səhifəlik hesabatında 90-dan çox ölkədə insan haqlarının durumunu nəzərdən keçirir. Qurumun direktoru Kenneth Roth yazır ki, insan haqları prinsiplərinin müdafiəsinə qalxan siyasi liderlər avtoritar populist siyasəti məhdudlaşdırmağın mümkün olduğunu göstərdilər.
Azərbaycanda son bir ildə həbs olunanlar sırasında videobloqqer Mehman Hüseynovun, gənc fəal Elgiz Qəhrəmanın, müxalifət AXCP-nn sədr müavini Gözəl Bayramlının, jurnalist Əfqan Muxtarlının adları çəkilir. Öncəki illər həbs olunmuş onlarla jurnalist və fəalın, məsələn REAL hərəkatının lideri İlqar Məmmədovun hələ də həbs cəzası çəkdiyini qeyd olunur.
*** Buna da bax: Əli Həsənov: “Avropa ölkələrində jurnalistlər həbs olunur...”
“MÜNASİBƏTLƏRDƏN YARARLANA BİLMƏYİB”
“Hakimiyyət tənqidçi medianı da boğub. Mayda milli təhlükəsizliyə hədə yaratdığını iddia edərək hakimiyyət AzadlıqRadiosu da daxil olmaqla, bir sıra müstəqil və müxalifət orqanlarının vebsaytlarını qapadıb”, – hesabatda vurğulanır.
Daha sonra sənəddə dekabrda qüvvəyə minmiş, Vəkillər Kollegiyasının üzvü olmayanların məhkəmələrdə müdafiə işini məhdudlaşdıran qanunvericilik dəyişikliklərinə toxunulur. Bu addımın siyasi işlərə çıxan azsaylı vəkillərin sayını daha da azaldacağı vurğulanır.
*** Buna da bax: Hüquq müdafiəçisi: 'Çox istərdim deyəm ki, durum yaxşılaşır... Deyə bilmirəm'
“Birləşmiş Ştatlar, Avropa Birliyi və Azərbaycanın digər ikitərəfli və beynəlxalq tərəfdaşları hökumətin tənqidçiləri hədəfə almasını pisləyib, amma insan haqlarının durumunun yaxşılaşdırılması yönündə mənalı addımlara nail olmaqdan ötrü münasibətlərdən effektiv yararlana bilməyib. AB Azərbaycanın insan haqları sahəsində real islahatlar aparmamasına baxmayaraq, Azərbaycanla yeni hərtərəfli tərəfdaşlıq razılaşması üzrə danışıqlara başlayıb”, – Human Rights Watch bildirir.
Azərbaycanın rəsmiləri bu hesabata, hələlik reaksiya verməyib. Ancaq indiyədək hakimiyyət təmsilçiləri ölkədə insan haqlarının durumuyla bağlı beynəlxalq tənqidləri qəbul etməyiblər, fundamental hüquq və azadlıqların tam təmin olunduğunu bildiriblər. «Human Rights Watch», «Freedom House», «Amnesty International» hüquq-müdafiə qurumlarının tənqidləri isə ölkəyə qarşı «məqsədyönlü qarayaxma kampaniyası» kimi dəyərləndirilib.
