Ermənistanda Konstitusiya Məhkəməsi keçmiş prezident Robert Kocharian-ın həbsinin qanunsuz olduğu barədə hökm verəndən sonra onun vəkilləri müştərilərinin dərhal azad olunmalı olduğunu bildiriblər.
Buna baxmayaraq Kocharian-ın işi üzrə birinci instansiya məhkəməsinin iclası sentyabrın 12-də keçiriləcək.
AzadlıqRadiosunun Erməni xidməti bildirir ki, Konstitusiya Məhkəsi öz qərarının yalnız yekun hissəsini elan edib.
Hökmün tam mətni indiyədək dərc olunmayıb.
Hakimiyyət orqanları Konstitusiya Məhkəməsinin qərarına baxmayaraq Robert Kocharian-ı azad etməyə tələsmir.
Ermənistan ədliyyə nazirinin müavini Srbui Galyan deyib ki, Konstitusiya Məhkəməsinin qərarı Kocharian barədə qətimkan tədbirinin dəyişdirilməsinə əsas vermir.
Xanım Galyan bildirir ki, Konstitusiya Məhkəməsi Robert Kocharian-ın həbsinə əsas olmuş maddənin qanuna zidd olduğu barədə heç nə deməyib.
Ədliyyə nazirinin müavini deyir ki, Konstitusiya Məhkəməsi eks-prezidentin məsələsinə ümumiyyətlə baxmamalı idi.
Ermənistanın tanınmış vəkillərindən Tigran Yegoryan isə deyib ki, hazırkı Konstitusiya Məhkəməsinin qərarları tanına bilməz, çünki bu məhkəmənin heyət üzvləri keçmiş hakimiyyətin dövründə 1 mart hadisələri ilə bağlı hökumətin xeyrinə olan qərarlar verib.
Keçmiş prezident Kocharian 2008-ci ilin martında ölkənin konstitusiya rejimini devirməkdə ittiham olunur.
Həmin vaxt prezident postunu tərk etməkdə olan Kocharian ölkədə fövqəladə vəziyyətin elan olunmasına göstəriş vermiş və bundan sonra 8 nəfərin ölümü ilə nəticələnmiş toqquşmalar olmuşdu.
Yegoryan hələ ötən iyul ayında bildirmişdi ki, Konstitusiya Məhkəməsi bu hadisələr barədə əvvəllər qərəzli və ədalətsiz qərarlar çıxarıb.
