ABŞ dövlət katibi Mike Pompeo demokratları Dövlət Departamenti rəsmilərini “təhdid” etmək və “qısnamaya” salmaq cəhdində ittiham edib.
O bildirib ki, demokratlar prezident Donald Trump-ın impiçment araşdırması çərçivəsində Dövlət Departamenti işçilərindən and altında ifadə istəyirlər.
Pompeo oktyabrın 1-də Konqres komitələrinə yazdığı məktubda bildirir ki, rəsmilərdən könüllü şəkildə ifadə vermələri üçün təyin olunmuş vaxt “kafi” deyil:
Pompeo deyib ki, o rəsmiləri təhdidlərdən müdafiə etmək üçün imkanındakı bütün vasitələrdən istifadə edəcək.
Pompeonun Konqres komitələrinin tələb etdiyi sənədləri oktyabrın 4-dək təqdim edib-etməyəcəyi hələlik bəlli deyil.
Demokratların çoxluğa malik olduqları Nümayəndələr Palatasının üç komitəsi Dövlət Departamentinin beş hazırkı və keçmiş rəsmisindən andlı ifadələrin iki həftə müddətində verilməsini tələb edib.
Ötən həftə çağırışları göndərmiş komitələrin sədrləri bildiriblər ki, onların araşdırmasına maneçilik törədilməsi Konqresin impiçment təhqiqatını əngəlləmək cəhdi kimi qiymətləndiriləcək.
Trump-a qarşı impiçment araşdırmasına kəşfiyyat nümayəndəsinin prezidentin Ukrayna lideri Volodymyr Zelenksiy ilə telefon söhbətindən şikayət verməsindən sonra başlanıb.
Şikayətdə deyilirdi ki, Trump iyulun 25-də Zelenskiy ilə telefon söhbətində ondan keçmiş vise-prezident Joe Biden və onun oğlunun təhqiq edilməsini istəyib.
Joe Bidenin oğlu Ukraynada enerji şirkətlərindən birinin direktorlar şurasının üzvü olub.
Joe Biden isə Trump-ın 2020-ci il ABŞ seçkisində əsas rəqibi ola bilər.
Bidenlərin qanunsuzluğa yol verdiklərinə dair sübutlar məlum deyil.
