AzadlıqRadiosunun Rus xidməti yazır ki, oktyabrın 2-də Ukraynanın bir neçə şəhərində “Steinmeier formulu” deyilən sənəd barədə üçtərəfli razılığın əldə edilməsinə etiraz aksiyaları keçirilib.
Mitinqçilər Donbasın rusiyayönlü separatçı bölgələrinə “xüsusi statusun” tanınması barədə razılaşmanı “Rusiya qarşısında kapitulyasiya” adlandırıblar.
Ən böyük etiraz aksiyası paytaxt Kiyevin mərkəzi meydanında keçirilib. Bu mitinqdə 1500-dək etirazçının iştirak etdiyi xəbər verilir.
Onlar “Vova çıx”, “Kuçma get”, “Zelya (Zelenskiy) get”, “təslimçiliyə yox” şüarlarını səsləndirirdilər.
Əvvəlcə mitinq Maydanda keçirilirdi, lakin etirazçılalr daha sonra prezident Volodymyr Zelenskiy-nin administrasiyasının qarşısına gəliblər.
Ölkə parlamenti Verxovna Radada “Steinmeier formulu” qızğın mübahisələrə səbəb olub.
Radanın sessisyasından əvvəl prezident Zelenskiy öz partiyasının fraksiya üzvləri ilə görüşüb.
Lakin prezident bütün deputatların qarşısında çıxış etmək istəməyib.
Zelenskiy keçirdiyi brifinqdə deyib ki, sənəddə Ukraynanın qorxacağı heç bir müddəa yoxdur.
O bildirib ki, “avtomat və pulemyotların lüləsi altında heç bir seçki keçirilməyəcək”.
Avropa İttifaqında Steinmeier formulunu Ukraynanın şərqində sülhə doğru addım adlandırıblar.
Sənədə əsasən Ukrayna rusiyayönlü separatçıların nəzarətində oaln ərazilərə xüsusi status vermək öhdəliyi götürür.
Zelenskiy deyib ki, bu, qondarma DXR və LXR-də seçkilərin yalnız Ukrayna qanunlarına uyğun keçiriləcəyi təqdirdə baş verəcək.
Bu seçkilərin habelə ədalətli və rəqabətli keçdiyi ATƏT müşahidəçiləri tərəfindən təsdiq edilməlidir.
Oktaybrın 1-də Donbas münaqişəsinə dair üztərəfli kontakt qrupu (Ukrayna, Rusiya, ATƏT) “Steinmeier formulu” deyilən sənəd barədə razılığa gəlindiyini bildirmişdi.
Sənədi Ukrayna tərəfindən keçmiş prezident Leonid Kuchma imzalayıb.
Sənəd habelə “Normand dördlüyü” (Almaniya, Fransa, Rusiya, Ukrayna) tərəfindən razılaşdırılıb.
