London məhkəməsində Qazaxıstanın keçmiş prezidenti Nursultan Nazarbaevin nəvəsinə 18 aylıq şərti cəza verilib. O polis çavuşunu dişləməkdə ittiham olunur.
Londondakı Sausuork Məhkəməsinin oktyabrın 18-də elan edilmiş hökmündə bu da qeyd olunur ki, 29 yaşlı Aisultan Nazarbayev narkomaniyadan müalicəsini davam etdirilməli, 140 saat müddətində ictimai icma işləri görməli, 1000 funt sterlinq (1285 dollar) cərimə və 5 min funt sterlinq (6420 dolar) təzminat ödəməlidir.
Məhkəmə sənədlərindən məlum olur ki, Aisultan Nazarbayev iyunun 5-də Londonun mərkəzindəki Kovent Qarden parkındakı evlərdən birinin balkonunda çığırırmış.
Müstəntiqlər ehtimal edirlər ki, o Kseniya Shevelyova adlı qadının balkonuna soxulub. Shevelyova bu adamı tanımadığında israr edir.
Bu da qeyd olunur ki, Aisultan Nazarbayev Shevelyova-nın balkonundakı və mənzilindəki mebellərə ziyan vurub.
Daha sonra o binanın damına dırmaşaraq oradan başqa bir qadının balkonuna girib. Polisə də həmin qadın zəng edib.
Polis çavuşu Ross Sambrook qadının mənzilinə girməyə çalışan Nazarbayevi dayandırmaq istəsə də o polisin əmrlərinə tabe olmayıb və onun əlini dişləyib.
Məhkəmədə bildirilib ki, polisin əlindəki dərin dişlək yarasından qan fışqırırmış.
Bu hadisədən iki gün əvvəl Aisultan Nazarbayev International Park Plaza otelindəki balkonlardan birinə çıxmış və özünü aşağı atacağı ilə hədələmişdi.
Nursultan Nazarbaev Qazaxıstana 1989-cu ildən bəri prezidentlik etdikdən sonra bu ilin martında istefa verib.
Buna baxmayaraq o hakim partiyanın liderliyində qalır və “xalqın başçısı” titulunu daşıyır. Bu ona gələcəkdə hər hansı mühakimədən immunitet verir.
O habelə qüdrətli Milli Təhlükəsizlik Şurasının sədridir.
Aisultan Nazarbayevə gəlincə isə o, 2017-ci ildə ölkə futbol federasiyasının vise-prezidenti idi.
