AXCP sədrinin müavini Seymur Həzinin həbs cəzası 15 gündən 30 günə qaldırılıb. Bu barədə oktyabrın 29-da Bakı Apellyasiya Məhkəməsində hakim Faiq Qasımov qərar çıxarıb.
Qərar Xətai Rayon Polis İdarəsinin rəisi İlqar Məmmədovun şikayəti əsasında verilib. Şikayətdə yazıb ki, Seymura Xətai Rayon Məhkəməsinin təyin etdiyi cəza yüngüldür.
Məhkəmədə idarəni Xətai rayon polis idarəsinin əməkdaşı, polkovnik leytenant Rəhman Kərimov müdafiə edib.
Seymur Həzi məhkəmədə deyib ki, bu şikayətin məqsədi onu Milli Şuranın noyabrın 2-nə təyin etdiyi mitinqdən də kənarda saxlamaqdır, çünki 15 günlük cəzası noyabrın 1-də başa çatacaqdı:
“Dövlətin dünyəviliyi prinsipinin altına belə ling salmaq olmaz. Hüququn başına açdığınız oyunlara görə hamınız cavab verəcəksiniz. Sabah bəlkə məni öldürəcəksiniz, amma birisigün mütləq cavab verəcəksiz. Kim ki İlham Əliyevə görə millətə zülm eləyir, hamısı cavab verəcək".
***
Seymur Həzi: ‘Günə gün yatmışam, nə İlham Əliyevdən, nə də məhkəmələrindən xahişim olub...’
AXCP sədrinin müavini Seymur Həzi deyir ki, Əhmədlidə binanın həyətində dayandığı vaxt üç nəfər mülki geyimli onu tutub aparıb. Ardınca da Xətai rayonu, 34-cü polis bölməsində onun haqqında protokol tərtib ediblər. Orada yazılıb ki, Seymur Həzi telefonla yüksək səslə danışıb, nalayiq ifadələr deyirmiş, onu intizama dəvət edən polislərə də müqavimət göstərib. Bölmədə təxminən 4 saat saxlayandan sonra onu Xətai Rayon Məhkəməsinə aparıblar. Onun haqqında İnzibati Xətalar Məcəlləsinin 510 (xırda xuliqanlıq) və 535.1 (polisin qanuni tələbinə tabe olmamaq) maddələrilə 15 gün inzibati həbs qərarı çıxarılıb. Həmin qərardan verilən şikayətə oktyabrın 28-də Bakı Apellyasiya Məhkəməsində baxılıb.
“Bu dəfə məni xırda xuliqanlıqda ittiham edirlər. 2014-cü ildə isə məni böyük xuliqanlıqda ittiham edən İlham Əliyevin məhkəmələrinin əli ilə 5 il həbs cəzası almışam. Günə gün yatmışam. Amma nə İlham Əliyevdən, nə də məhkəmələrindən xahişim olub. Sizdən də xahişim yoxdur. Sadəcə, məhkəmələri belə aciz görmək istəməzdim”, – Seymur Həzi məhkəmədə belə deyib.
“Necə oldu, bütün xuliqanlar ali təhsilli oldu?”
O vurğulayıb ki, həbsinin səbəbi Milli Şuranın 19 oktyabrda keçirdiyi mitinq olub.
Seymur Həzinin sözlərinə görə, o, AXCP sədrinin müavini kimi, mitinqin əsas təşkilatçılarından biri idi:
“Mənim həbsimdən iki gün sonra Əli Kərimlinin başına 9 tikiş qoyuldu. Qarabağda sinəsini irəli vermiş Tofiq Yaqublunun kürəyinə Nəsimi Rayon Polis İdarəsində çıxıb tapdaladılar. Necə oldu, bütün xuliqanlar ali təhsilli oldu?”
Seymur Həzi deyir ki, o, ümumiyyətlə, həmin vaxt telefonla danışmayıb.
Vəkili Şəhla Hümbətova da bildirib ki, mobil operatorlara sorğu göndərib cavab alıblar. Cavablardan görünür ki, saxlandığı vaxt Seymur heç kimlə telefonla danışmayıb.
Şəhla Hümbətova hakimdən də xahiş edib ki, bir daha mobil operatorlara sorğu göndərib, özləri də əmin olsunlar:
“Həmin ərazidəki müşahidə kameralarının görüntülərini də alıb baxsanız, polislərin yalan danışdığını görərsiniz. Təəssüf ki, birinci instansiya məhkəməsi heç bir araşdırma aparmayıb. Heç olmasa, siz araşdırın”.
Vəkil Seymur Həzinin Avropa Konvensiyasının 5 (azadlıq hüququ), 6 (ədalətli məhkəmə araşdırması hüququ) və 11-ci (toplaşma hüququ) maddələrilə təminat verilən hüquqlarının pozulduğunu da deyib:
“Ona ailəsilə əlaqə saxlamağa imkan verilməyib. İstədiyi vəkillə təmin olunmayıb. Sənədlərin surəti ona təqdim olunmayıb, protokolla tanış olmasına imkan verilməyib”.
Təxminən 1 dəqiqəlik müşavirədən sonra hakim İlqar Murquzov şikayətin təmin olunmadığını, Xətai Rayon Məhkəməsinin 17 oktyabrda çıxardığı 15 sutkalıq həbs qərarını qüvvədə saxlayıb.
Seymur Həzinin həyat yoldaşı Nigar Həzi AzadlıqRadiosuna bildirib ki, qərardan Avropa Məhkəməsinə şikayət göndəriləcək.
Xatırlatma
“Azadlıq” qəzetinin şöbə müdiri, “Azərbaycan saatı” televiziya proqramının aparıcısı və redaktoru olmuş Seymur Həzi 2014-cü il avqustun 29-da həbs edilib. Dayanacaqda Məhərrəm Həsənov adlı şəxsi su şüşəsi ilə vurmaqda suçlanan jurnalist CM-in 221.3 (silah və ya silah qismində əşya vasitəsilə xuliqanlıq) maddəsiylə 5 il azadlıqdan məhrum edilib.
Jurnalist ittihamı rədd edib və özünü təqsirli bilməyib. Seymur Həzi həbsinin səbəbini “Azadlıq” qəzetində hakimiyyəti tənqid edən məqalələri, “Azərbaycan saatı” proqramındakı çıxışlarıyla əlaqələndirib.
Amnesty International beynəlxalq insan haqları təşkilatı Seymur Həzini vicdan məhbusu kimi tanıyıb.
Azərbaycan hakimiyyəti isə ölkədə siyasi əqidəsinə, baxışlarına görə heç kəsin cəza çəkmədiyini deyir.
Seymur Həzi bu il avqustun 29-da – 5 illik həbs müddəti tamamlanan gün azadlığa çıxıb.
