Türkiyə beynəlxalq insan haqları qanunlarını pozanların mühazirələrini dinləmək fikrində deyil.
Türkiyənin ingilisdilli Daily Sabah saytının xəbərinə görə bu bəyanatı öktyabrın 28-də ölkənin BMT-dəki səfiri, Ankaranın Suriyada insan haqlarını pozmasına dair Çinin iddialarını rədd edərkən verib.
Xəbərdə deyilir ki, Çinin BMT-dəki daimi nümayəndəsinin müavini Geng Şuanq Təhlükəsizlik Şurasının Suriyaya həsr edilmiş iclasında Türkiyəni Suriyanın şimalını işğal etməkldə günahlandırıb.
Çin nümayəndəsi habelə Ankaranı Fərat çayında və Aluk su anbarındakı suyun səviyyəsinin düşməsinə görə ittiham edib.
Səfir YPG qüvvələrini ittiham edib
Gengin iddialarına cavab verən səfir Feridun Sinirlioğlu deyib:
"Biz beynəlxalq insan haqlarını və humanitar qanunları pozanların mühazirəsini dinləmək fikrində deyilik”.
Aluk su anbarı ilə bağlı məsələ BMT baş katibinin hesabatına daxil edilmişdi.
Su anbarında yaranmış vəziyyəti izah edən Sinirlioğlu deyib ki, Suriya kürdlərinin silahlı YPG birləşmələri və Suriya rejimi bu mövzunu qabardaraq ondan öz məqsədləri üçün sui-istifadə edirlər.
Sinirlioğlu qeyd edib ki, “hazırda həmin bölgədə ən əsas pozucu faktor mülkilərə və Türkiyəyə hücumlar edən PKK/YPG birləşmələridir”.
Səfir əlavə edib ki, iki həftə bundan əvvəl Afrində törədilmiş bomba hücumunda 6 mülki şəxs həlak olub.
Türkiyə səfiri iddia edib ki, YPG həm də Suriya yezidilərinin və kürdlərinin öz evlərinə qayıtmalarına mane olur.
Türkiyə Çini pisləyən bəyanata qoşulmuşdu
Türkiyə Suriyanın şimalındakı İdlib qəzasına nəzarət edən anti-Əsəd qüvvələrinə dəstək verir. Bu bölgə Suriya lideri Bəşər əl-Əsədə qarşı mübarizə aparan silahlı müxalifətin son istehkamıdır.
Türkiyə habelə Suriyada əsasən kürdlərdən ibarət YPG xalq müdafiə birləşmələrini Avropa İttifaqı və ABŞ-ın terrorçu siyahısına daxil etdiyi PKK-nın qolu sayır.
ABŞ Suriyadakı kürd qüvvələrini özünün müttəfiqi hesab edir.
2011-ci ildən bəri davam edən Suriya münaqişəsində Rusiya və İran Əsəd hökumətinə dəstək verirlər.
Daily Sabah yazır ki, BMT-nin ötən həftə verilmiş birgə bəyanatında Türkiyə də daxil 43 ölkə Çinin Sintzyan vilayətində uyğurlara qarşı törədilən insan haqları pozuntularını pisləyib.
Sözü gedən bəyanatda Çinə “qanunun aliliyinə tam riayət etməsi” üçün çağırış edilirdi.
Qərb ölkələrinin də qoşulduğu bu bəyanatda Sintzyan vilayəti boyunca yaradılmış saxlama düşərgələri şəbəkəsindən narahatlıq ifadə olunurdu.
