BMT nümayəndəsi: Bu 2-ci Dünya Müharibəsindən sonra ən sürətlə artan qaçqın böhranıdır
Rusiya qoşunlarının hərbi müdaxiləsi başlayandan bəri Ukraynanı bir milyon yarımdan çox insan tərk edib.
Belə bir məlumatı BMT-nin Qaçqınlar üzrə Ali Komissarı Filippo Qrandi “Twitter” səhifəsində yayıb:
“Ukraynadan 1,5 milyondan çox qaçqın 10 gün ərzində qonşu ölkələrə keçib ki, bu, İkinci Dünya Müharibəsindən bəri Avropada ən sürətlə böyüyən qaçqın böhranıdır. ” -deyə o bildirib.
Həkimlər xəstəxanın zirzəmisində işləmək məcburiyyətindədirlər
Ukraynalı həkimlər uşaqları xəstəxananın zirzəmisində xilas edirlər. Məlumata görə, balaca xəstələr arasında döyüş zamanı yaralananlar da var.
Zelenski deyir Rusiya mülki əhalinin bombalanmasını əvvəlcədən planlaşdırıb
Martın 6-da etdiyi videomüraciətində Zelenski Ukraynada şəhərlərin və mülki əhalinin bombalanmasının Rusiya tərəfindən əvvəlcədən planlaşdırıldığını bildirib.
Onun sözlərinə görə, bunu əsir düşən əsgərlərdəki sənədlər, planlar və xəritələr sübut edir. Zelenski rusiyalılara müraciət edib:
"İndi sussanız, sizin adınıza sonra ancaq yoxsulluğunuz danışacaq. Buna ancaq repressiya cavab verəcək. Susmayın".
Ukrayna prezidenti rus qoşunlarının Odessanı bombalamağa hazırlaşdığını da bildirib. "Bu, hərbi və tarixi cinayət olacaq", - Zelenski bildirib.
Jurnalistlər atəş altına düşüblər
Kiyev yaxınlığındakı İrpin rayonunda çəkiliş aparan Nastoyashcheye Vremya-nın çəkiliş qrupun yaxınlığına mərmi düşüb.
Jurnalist Roman Suxanın dediyinə görə, mərmi onların 20 metrliyində partlayıb:
"Biz ancaq Romanovkadan çıxa bildik və bizdən 20 metr aralıda mərmi düşdü. Nə olduğunu bilmirəm, amma yerə uzanmağa müvəffəq olduq. Ayağa qalxanda isə yalnız mərminin düşdüyü yeri gördük. Evlər yanır,ölənlər var. Mən öz gözlərimlə dörd ölü gördüm - iki gənc oğlan, bir azyaşlı uşaq, bir qadın. Kiyevə həm güllə, həm də qəlpə yarası alan çoxlu yaralı gətirilir. Burada gördüyümüz şok edicidir."