Ermənistanın Xarici İşlər Nazirliyinin (XİN) sözçüsü Vladimir Karapetyan ABŞ Dövlət Departamentinin öz hesabatına düzəliş etməsini, Dağlıq Qarabağı yenidən Azərbaycan ərazisi kimi göstərməsini tənqid edib. O, Departamentin məsələyə qeyri-ciddi yanaşdığını deyir.
ABŞ Dövlət Departamentinin 2006-cı il insan haqları ilə bağlı hesabatının ilkin variantında yazılmışdı ki, «Ermənistan Dağlıq Qarabağ və Azərbaycanın yeddi rayonunu işğal edib». Düzəlişdən sonra isə həmin cümlə bu şəkilə salınmışdı: «Erməni hərbi qüvvələri Dağlıq Qarabağa bitişik Azərbaycan ərazisinin böyük hissəsini işğalda saxlayır». Bu dəyişikliyə görə, Azərbaycan hökuməti aprelin 23-24-də Amerikaya səfərini təxirə salmışdı – Vaşinqtonda ikitərəfli təhlükəsizlik məsləhətləşmələri keçirilməliydi.
Aprelin 26-də Azərbaycanın Xarici İşlər naziri Elmar Məmmədyarov deyib ki, iki ölkə təhlükəsizlik sahəsində məsləhətləşmələri davam etdirəcək.
