«Təəssüflər olsun ki, bu kimi insidentlər bütün dünyada baş verir». ABŞ-ın Azərbaycandakı səfiri Enn Ders oktyabrın 30-da Birləşmiş Ştatlar səfirliyinin son iki gündə fəaliyyətini məhdudlaşdırmasını şərh edərkən belə deyib: «Biz təhlükəsizliyə olan hədələrə tam ciddi yanaşırıq. Lakin onlar bizi öz işimizi davam etdirməkdən daşındıra bilməz».
Xanım Ders deyir ki, bu məsələnin çözülməsində Azərbaycan hökuməti mükəmməl əməkdaşlıq edib: «Biz normal fəaliyyət rejiminin bərpa edilməsi prosesindəyik».
Milli Təhlükəsizlik Nazirliyi oktyabrın 29-da yaydığı bəyanatda bildirib ki, Bakıda bir sıra dövlət strukturlarına, habelə beynəlxalq anti-terror koalisiyasına üzv olan dövlətlərin səfirliklərinə və nümayəndəliklərinə qarşı planlaşdırılan terror və təxribat aktlarının qarşısı alınıb.
Həmin gün və oktyabrın 30-da ABŞ və Böyük Britaniyanın Bakıdakı səfirlikləri öz fəaliyyətlərini məhdudlaşdırıblar.
