Pakistan prezidenti Pərviz Müşərrəf ölkədə fövqəladə vəziyyət elan edib. O, bunu dövlət televiziyası ilə çıxışında deyib. Bildirib ki, buna səbəb ölkənin şimal-qərbində taliblər və «əl-Qaidə» yaraqlıları ilə yaranmış gərgin vəziyyətdir.
Dövlət televiziyasının məlumatına əsasən, ölkə ərazisində konstitusiyanın qüvvəsi dayandırılıb.
«Reuters» agentliyi özəl telekanallara istinadən xəbər verir ki, Ali Məhkəmənin sədri İftixar Çaudri və daha səkkiz hakim prezidentin bu sərəncamını dəstəkləməkdən boyun qaçırıb. Sonradan Çaudriyə «sənin xidmətinə artıq ehtiyac yoxdur» deyilib.
Polis İslamabadda Ali Məhkəmənin binasına aparan yolu bağlayıb. Pakistan paytaxtında telefon əlaqəsi kəsilib, bir neçə özəl telekanalın yayımı dayandırılıb.
Noyabrın 5-də Ali Məhkəmədə Pərviz Müşərrəfin prezident seçilməsinin qanuniliyi məsələsinə baxılmalıdır. Oktyabrın 6-da o, prezident seçkisində qalib olub. Amma müxalifət iddia edir ki, 1999-cu ildə hərbi çevriliş nəticəsində hakimiyyətə gələn General Müşərrəfin ordu komandanı ola-ola, yenidən seçilmək hüququ yox idi.
«Human Rights Watch» beynəlxalq hüquq müdafiə təşkilatı isə Pakistanda fövqəladə vəziyyətin elan olunmasını pisləyib.
Təşkilatın nümayəndəsi Əli Dayan Həsən «əl-Cəzirə» televiziyasına deyib ki, prezident Müşərrəf «biabırçı addım» atıb və bu, öz hakimiyyətini saxlamaq üçün «ümidsiz addımdan» başqa bir şey deyil.
