Faina Kunqurovanın ölümündə kənar təsirin olmadığı üçün Nizami rayon prokurorluğu cinayət işinin başlanmasını rədd edib. Bu barədə Respublika Prokurorluğunun mətbuat xidmətinin rəhbəri Vüqar Əliyev «Turan»a bildirib.
Məhkəmə-tibb ekspertizasından prokurorluğa daxil olan rəyə görə, F.Kunqurova baş beyin və ağ ciyər ödəmləri, ürək əzələsində damarətrafı sklerotik dəyişikliklər fonunda kəskin ürək, qan - damar çatışmazlığından vəfat edib», -deyə qeyd edib.
F.Kunqurova Azərbaycan Demokrat Partiyasının keçmiş fəalı olub. O əvvəllər də həbs edilib və Avropa Şurasının tələbi ilə azadlığa buraxılıb.
Bu dəfə isə F.Kunqurova 2007-ci il oktyabrın 6-da həbs edilib və Şüvəlan istintaq təcridxanasında saxlanıb.
Ailə üzvlərinin dediyinə görə, polis onu şübhəli şəkildə dövlət başçısının korteji keçən yolun yaxınlığında dayandığına görə saxlayıb. Bundan sonra, onun evində axtarış zamanı narkotik tapıldığı deyilir.
İşgəncələr Əleyhinə Komitənin rəhbəri Elçin Behbudov bildirib ki, həbsxanada o qidadan imtina edib. Oktyabrın 19-da F.Kunqurova Böyük-Şordakı xəstəxanaya göndərilib. Noyabrın 18-də o birdən ürək ağrılarından şikayət edib və həkim gələnədək vəfat edib.
