«Biz necə millətik ki, bu torpaqda Cümhuriyyəti yaradan bir nəfərin də məzarı yoxdur»- «Azadlıq» radiosunun «Can Bakı» verilişinə müsahibə verən professor Şirməmməd Hüseynov belə deyib.
Professor bildirir ki, Azərbaycan Xalq Cümhuriyyəti Milli Şurasının ilk sədri Məmməd Əmin Rəsulzadənin və digər Cümhuriyyət qurucularının məzarları Bakıya gətirilməlidir:
«Mən 1956-cı ildə Stalinin ifşa iclasında baş katib Abdullayevə dedim ki, stalinçilər müsavatçıları güllələyiblər. Heç olmasa, indi desinlər, onları harada basdırıblar, tapaq, gətirək. Belə millət olmaz. Gürcülər, lap elə ermənilər kimi bir dənə abidə yaradaq ki, bütün millət ora axışıb getsin».
Mayın 28-də Türkiyədə Məmməd Əmin Rəsulzadənin abidəsi ucaldılacaq. Şirməmməd Hüseynov deyir ki, türklər Rəsulzadəyə adidə qoymaqla bizə dərs verirlər ki, «bunu siz bacarmadınız, biz etdik...»
