Tramp seçkidə qələbəyə yaxınlaşır
Donald Tramp hazırda Florida ştatında, Uest-Palm-Biçdə tərəfdarları qarşısında çıxış edir. O, prezident seçkisində, Konqresdə qələbəsindən danışır, həyat yoldaşı və övladlarına təşəkkür edir.
Artıq AP Trampın daha bir həlledici ştatda – Pensilvaniyada qələbə çaldığını təsdiqləyib, onun qalibiyyət üçün gərəkən 270 səsdən 267-ni yığdığını bildirib.
Macarıstanın baş naziri Viktor Orban Donald Trampı seçkidə "böyük" qələbəsi münasibətilə təbrik edib. O bunu "ABŞ siyasi tarixində ən böyük qayıdış", dünya üçün "çox gərəkli qələbə" adlandırıb.
Macarıstanın keçmiş baş naziri Ferents Dyurçan isə yazıb ki, "dünya indi Trampla bir müddət daha qarışıq olacaq. Ancaq biz də öhdəsindən gələrik".
Ukrayna prezidenti Volodimir Zelenski Donald Trampı seçkidə "təsirli" qələbəsi münasibətilə təbrik edib. O, X hesabında Trampla sentyabrda görüşünü xatırladıb, Ukrayna-ABŞ strateji tərəfdaşlığını, "Qələbə planı"nı, Rusiyanın Ukraynaya qarşı təcavüzünə son qoymaq yollarını detallı müzakirə etdiklərini yazıb. "Prezident Trampın qlobal məsələlərdə güc yoluyla sülhə sadiqliyini dəyərləndirirəm. Biz Ukraynada sülhü məhz bu prinsiplə yaxınlaşdıra bilərik. Ümidvaram ki, bunu birlikdə həyata keçirəcəyik", – Zelenski vurğulayıb.
Belarus müxalifətinin mühacirətdə olan lideri Svetlana Tixanovskaya Trampı seçkidə "qətiyyətli" qələbəsi münasibətilə təbrik edib. "Belarusa azadlıq gətirməkdən ötrü ABŞ ilə əməkdaşlığımızı davam etdirməyi və genişləndirməyi səbirsizliklə gözləyirəm. Ölkəmizin istibdaddan azad olunması uğrunda savaşımızda ABŞ daima bizim əsas müttəfiqimiz olacaq", – o yazıb.