Ağsuda da etiraz aksiyası keçirilib
Yanvarın 13-də Ağsuda da sakinlər etiraz aksiyası keçirib. Onlar bahalıq, işsizlik, maaş probleminə öz etirazlarını bildiriblər.
Ağsunun mərkəzində başlayan aksiyasının iştirakçıları etirazlarını çatdırmaq üçün yerli icra hakimiyyətinin binasına yürüş ediblər. İcra başçısının onlarla görüşünü tələb ediblər. İcra başçısı Ənvər Seyidəliyev etirazçılardan 25-30 nəfəri qəbul edib. Qəbula qatılanlardan biri rayon sakini, Elşən Məmmədov AzadlıqRadiosuna deyib ki, icra başçısı ilə görüş azı bir saat davam edib:
“İcra başçısı bizi dinlədi. Bildirdi ki, bizim etirazımızı adiyyatı yerlərə çatdıracaq”.
Elşən Məmmədov deyir ki, görüşdən sonra etirazçılar dağılışıb. Amma vəziyyət düzəlməsə, yenidən aksiya keçirəcəklər.
55 nəfər saxlanıb
Yanvarın 12-13-də Siyəzəndə baş vermiş hadisələrə görə 55 nəfər saxlanılıb. Respublika Prokurorluğu və Daxili İşlər Nazirliyinin yaydığı birgə məlumatda belə deyilir.
Məlumata görə, "törədilmiş əməllərlə bağlı Cinayət Məcəlləsinin 186.2.2, 233 və 315.2-ci maddələri ilə (İctimai qaydanın pozulmasına səbəb olan hərəkətləri təşkil etmə və belə hərəkətlərdə fəal iştirak etmə, özgə əmlakını qəsdən zədələmə, hakimiyyət nümayəndələrinə həyat və sağlamlıq üçün təhlükəli olan zor tətbiq etməklə müqavimət göstərmə) cinayət işi başlanıb.
Məlumatda deyilir ki, saxlanılmış şəxslərdən bir neçə nəfəri cinayət məsuliyyətinə cəlb edilib.
“Siyəzən, Lənkəran, Füzuli, Ağcabədi, Ağsu şəhər və rayonlarında törədilmiş və ölkədə ictimai asayişin pozulmasına hesablanmış qanunazidd əməllər AXCP və Müsavat partiyalarının fəalları, həmçinin bir sıra radikal və dini ekstremist qüvvələr tərəfindən təşkil edilib”.
Siyəzəndə gecə: polislər insanları dağılışmağa çağırır - Video, Foto
Yanvarın 13-də sosial tələblərlə etiraz aksiyası keçirilmiş Siyəzəndən gecə görüntüləri. Əliavtomatlı polislər hələ də küçələrdə qalan etirazçıları dağılışmağa səsləyirlər.
Siyəzənin mərkəzi küçəsinə Çevik Polis Alayının xüsusi təyinatlıları nəzarət edirlər. Şəhərdə bütün mağazalar bağlıdır. Sakinləri küçəyə çıxmağa qoymurlar.
Axşamüstü sakinlər yolları bağlamağa cəhd ediblər, polis gəldikdə isə ərazidən uzaqlaşıblar. Bəzi etirazçılar polisə daş atıblar.
Siyəzəndə sakitlikdir
AzadlıqRadiosunun əməkdaşı xəbər verir ki, yanvarın 13-dən fərqli olaraq bu gün Siyəzən rayonunda sakitlikdir, meydan boşaldılıb. Küçələrdə təkəmseyrək hallarda insanlar gözə dəyir. Polis insanların qrup şəklində bir yerdə toplanmasına icazə vermir.
Dünən axşam saatlarında etirazçıların toplaşdığı və tonqal qaladığı Dərə məhəlləsində Çevik Polis Alayının xüsusi təyinatlıları əməliyyat keçirir. Onların etirazçıları axtardıqları bildirilir.
Bundan başqa, xüsusi təyinatlılar bəzi ara məhəllələrdə nəzarəti gücləndiriblər.