ABŞ-İN ATƏT-DƏKİ SƏFİRİ AZADLIQRADİOSUNA BASQILARI PİSLƏYİR
“Azad media üzərinə hücum zəif, özünə inamı olmayan və korrupsiyalı hökumətlərin və liderlərin davranışıdır".
Bunu ABŞ-ın ATƏT-dəki səfiri Daniel Baer Bakıda AzadlıqRadiosunun ofisinə reyd və onun bağlanması ilə əlaqədar özünün tvitter hesabından yazıb.
#AzadliqRadiosu Sərhədsiz Reportyorlar təşkilatı AzadlıqRadiosunun bürosuna reydi pisləyib http://t.co/LzLw8np75D via @radioazadliq
— AzadliqRadiosu (@RadioAzadliq) 27.12.2014
ABŞ DÖVLƏT DEPARTAMENTİNİN YÜKSƏK SƏVİYYƏLİ RƏSMİSİNDƏN MEDİA ÜÇÜN AÇIQLAMA
ABŞ Dövlət Departamentinin yüksək rütbəli rəsmisi AzadlıqRadiosunun Bakı ofisinin möhürlənməsi və əməkdaşların istintaqa çəkilməsi barədə dekabrın 26-da mətbuat üçün aşağıdakı açıqlamanı yayıb:
- Biz AzadlıqRadiosunun Bakıdakı bürosunun ofisində əməkdaşların saxlanması, sorğu-suala çəkilmələri və polisin ofisdə axtarış aparması barədə xəbərlərdən çox ciddi şəkildə narahatıq.
- Bu istintaq və axtarışın səbəbləri aydın deyil.
- Biz hakimiyyət orqanlarını media azadlığının qorunması barədə Azərbaycanın beynəlxalq öhdəliklərinə hörmət etməyə çağırırq.
- Azad və müstəqil media hər bir dövlət üçün olduqca önəmlidir.
AZADLIQRADİOSUNUN ƏMƏKDAŞLARI KÜTLƏVİ ŞƏKİLDƏ PROKURORLUĞA DİNDİRİLMƏYƏ ÇAĞIRILIR
AzadlıqRadiosunun Bakı bürosunun ofisinin möhürlənməsindən sonra əməkdaşlarımız kütləvi şəkildə prokurorluğa çağırılır. Prokurorluq əməkdaşları hətta jurnalistləri gecə saatlarında da dindirməyə cəhd edirlər.
Jurnalistlər vəkkillərinin iştirakı üçün vaxt istəsələr də onları hətta zorla dindirilməyə gətiriləcəklərini deyirlər.
Artıq əməkdaşlardan bir neçəsi, hətta müxtəlif bölgələrdə çalışan müxbirlərimizi yerli prokurorluqlara çağırıb dindirirlər.
Vəkil Yalçın İmanov bildirir ki, jurnalistlərin tez-tələsik kollektiv şəkildə istintaqa cəlb edilməsinin niyyətini anlamaq çətindir. Dindirilməyə çağırılan bu sayda jurnalistlə müqavilələrin imzalanması, etibarnəmələrin hazırlanması iş günü olmadığı üçün zaman tələb edir: "Ağır Cinayətlərə dair İşlər üzrə İstintaq İdarəsinin müstəntiqi İqbal Hüseynov bununla bağlı mənə də zəng etdi. İzah etdim ki, jurnalistlərin vəkilin iştirakı olmadan dindirilməsi bizə qeyri-hüquqi niyyətlərdən xəbər verir. Ona görə də hər kəsin vəkillə təmin olunması üçün bir qədər zaman verilməsini istədik. Hələlik jurnalistlərin dindirilməsinin gələn həftənin əvvəlinə saxlanmasına ilkin olaraq razılaşıblar" - deyə vəkil bildirib.