Müsavat Partiyasından bildirirlər ki, 21 saylı Nəsimi-Binəqədi seçki dairəsinin 26 saylı məntəqəsində "karusel" əməliyyatını qeydə alan partiyanın üzvü Camaləddin Heybətə təzyiq edilir.
Həmçinin əlavə edildiyinə görə, 31 saylı Suraxanı ikinci seçki dairəsində "karusel" həyata keçirən qrupun bir-neçə məntəqədə səs vermək cəhdlərini qeydə alıblar.
Sözügedən dairə və məntəqə seçki komissiyalarından "Turan"a deyilənləri təkzib ediblər.
Şikayətlərin birində bildirilir ki, 33 saylı Xətai birinci seçki dairəsinin 24 saylı seçki məntəqəsində səsvermə kabinəsinə eyni vaxtda iki seçici daxil olub. Onlardan birinin digərinə kömək etdiyi vurğulanır.
70 saylı Neftçala seçki dairəsində səyyar səsvermə ilə bağlı şikayət var.
Deputatlığa namizəd Vəfa Nağının seçki qərargahından bildirilib ki, həmin seçki dairəsi üzrə 51 min 462 nəfər seçici qeydə alınıb, səyyar səsvermə üçün müraciətlərin isə 3 min olduğu bildirilir: "Neftçala üçün bu, fantastik rəqəmdir. O qədər xəstəliyi, əlilliyi olan adam varmı rayonda? Bu, şübhələr yaradır".
Müsavat Partiyasından verilən məlumata görə, 8 saylı Binəqədi birinci seçki dairəsində bir neçə müşahidəçiləri seçki məntəqəsinə buraxılmayıb. Partiyadan qeyd edildiyinə görə, Cavad Qafarovu 283 saylı məktəbdə yerləşən 12 saylı məntəqədən polis vasitəsilə çıxarıblar: "Digər müşahidəçi Eldar Nəsibzadə 20 və 21 saylı məntəqəyə buraxılmayıb. Deyirlər ki, müşahidəçi vəsiqəsində məntəqənin nömrəsi yazılmalıdır. Halbuki Mərkəzi Seçki Komissiyasının (MSK) respublika üzrə müşahidəçiləri istənilən məntəqədə müşahidə apara bilər".
Mərkəzi Seçki Komissiyasının (MSK) mətbuat xidmətindən isə "Turan"a deyiblər ki, Müsavat Partiyasının bu açıqlamasında deyilənlərin əsası yoxdur.