Vəkil Fariz Namazlı Dövlət Təhlükəsizliyi Xidmətini (DTX) məhkəməyə verib. Səbəb isə onun avqustun 31-də saat 21:00 radələrində dostları il’ kafedə olduğu vaxt saxlanılaraq DTX-ya aparılması və 3 saatdan çox orada şahid qismində dindirilməsidir.
F.Namazlının fikrincə, öncədən heç bir çağırış göndərilmədən, iş vaxtından sonra saxlanılması, telefonunun əlindən alınması və s. tutulmağa bərabərdir: "Əgər mənim şahid kimi dindirilməyimə zərurət vardısa, iş vaxtında, öncədən məni məlumatlandırmaqla DTX-ya dəvət edə bilərdilər. Məni tutub aparıblar, telefonumu götürüblər. O müddətdə telefonum DTX əməkdaşlarında olub. Mən şahid qismində dindirilsəm də, şübhəli şəxs kimi aparılmışam. Mənə qarşı baş verənlər faktiki tutulmağa bərabərdir".
Vəkil DTX əməkdaşlarına məxsus avtomobildə, onların əhatəsində aparılıb. Deyir ki, ora çatanadək niyə aparıldığını bilməyib və tutulduğunu düşünüb: "Çünki indiyədək Azərbaycanda vəkilin bu formada şahid kimi dindirməyə aparılması baş verməyib. Təxirəsalınmaz hal da yox idi".
Namazlının şikayətinə Səbail rayon Məhkəməsində baxılacaq. O, şikayətində Avropa İnsan Hüquqları Konvensiyasının 5-ci (azadlıq və toxunulmazlıq hüququ), 8-ci (şəxsi həyata hörmət hüququ), 18-ci (hüquqlarla bağlı məhdudiyyətlərdən istifadənin hədləri) maddələrinin pozuntusunun tanınmasını istəyib.
Xatırlatma
Avqustun 31-də axşam saatlarında vəkil F.Namazlının Bakıdakı kafelərdən birində DTX əməkdaşları tərəfindən saxlanması barədə məlumat yayılmışdı. Təxminən 4 saat sonra dostları onun sərbəst buraxıldığını bildirmişdi.
Sentyabrın 1-də vəkilin özü sosial media hesabından açıqlama yayaraq DTX-da sorğulanan bir cinayət işi üzrə şahid qismində dindirildiyini təsdiqləyib. F.Namazlı sözügedən açıqlamasında da vurğulamışdı ki, bu şəkildə dindirməyə aparılması faktiki tutmaya bərabərdir.
O əlavə etmişdi ki, dindirildiyi cinayət işi ilə bağlı hər hansı məlumat verə bilməyəcək.
F.Namazlının saxlanılar aparılması və dindirilməsi ilə bağlı deyilənlərə DTX-dan münasibət almaq mümkün olmayıb.
