Avropa Birliyinin deputatları blokun 27 üzvü arasında səyahəti asanlaşdırmaq üçün yeni səyahət sertifikatını təsdiqləyiblər. Bununla da yay səyahət mövsümü öncəsi sistemin vaxtında işə düşməsinə yol açılıb.
İyunun 9-da Avropa Parlamentinin Strasburqdakı iclasında açıqlanan səsvermə nəticələrini hələ AB üzvləri təsdiqləməlidirlər. Bu isə prosedur qaydası sayılır.
İyulun 1-dən başlayaraq 12 ay ərzində vaksinasiya, mənfi test nəticəsi, yaxud COVID-19-dan sağalmanı əks etdirən səyahət sertifikatı AB daxilində səyahətə imkan verəcək. Bunun üçün karantin, yaxud əlavə koronavirus testlərindən keçmək tələb olunmayacaq.
Hazırda AB-nin 27 üzvü arasında səyahət turistlər və hava şirkətləri üçün çaşdırıcı və yorucudur. Hər bir ölkə fərqli qaydalar və standartlar tətbiq edir.
AB sertifikatını ayrı-ayrı ölkələr pulsuz, həm kağız, həm də rəqəmsal formada verəcəklər.
QR kodu
Sənədlərdə təkmil təhlükəsizlik göstəriciləri olan QR kodu yerləşəcək. Şəxsi data digər ölkələrlə paylaşılmayacaq.
Amma sertifikat azad hərəkət üçün ilkin şərt, yaxud səyahət sənədi sayılmayacaq.
AB-nin bütün üzvləri digər ölkələrin verdiyi vaksinasiya sertifikatlarını qəbul etməlidirlər. Söhbət Avropa Dərman Agentliyinin təsdiqlədiyi vaksinlərdən gedir. Milli proseduralardan keçərək təsdiqlənmiş, yaxud Dünya Səhiyyə Təşkilatının təcili istifadəyə təsdiqlədiyi vaksinlərlə bağlı qərar vermək isə AB ölkələrinin üzərinə düşür.
AB-yə kənardan gələnlər daxil olmaq istədikləri üzv ölkədə sertifikata uyğun gəldiklərini sübut edəndən sonra bu sənədi ala biləcəklər.
Birliyin bir sıra üzvləri, o cümlədən Bolqarıstan, Xorvatiya, Çexiya, Danimarka, Almaniya, Yunanıstan və Polşa səyahətçilər üçün COVID-19 vaksinasiya sertifikatı sistemi tətbiq ediblər.
