Bu gün, martın 6-da bloqqer Mehman Hüseynovun həbsindən apellyasiya şikayəti verilib.
Bunu AzadlıqRadiosuna M.Hüseynovun vəkili Elçin Sadıqov bildirib: «Apellyasiya şikayəti bütün təfərrüatları ehtiva etməklə 23 səhifədən ibarətdir. Məsələ ətraflı təsvir edilmiş şəkildə apellyasiya instansiyana təqdim edilir».
E.Sadıqovun deməsinə görə, apellyasiya şikayətində M.Hüseynova bəraət verilməsi istənilir.
Buna da bax-Mehman Hüseynov: 'Nə göstəriş verilibsə, o olacaq'
Vəkil martın 6-sı M.Hüseynovla görüşdüyünü də bildirir: «Bu gün görüşdük. M.Hüseynov digər vəkillərin müdafiəyə qatılmasına etiraz etmədi. Amma müdafiə ilə bağlı bütün hüquqi sənədləri mənim hazırlamağımı istədi»,-deyə E.Sadıqov qeyd edib.
Vəkillərdən Yalçın İmanov və Fəxrəddin Mehdiyev də Mehman Hüseynovun müdafiəsinə qoşulmaq niyyətindədirlər. Ancaq bir müddət öncə vəkil Elçin Sadıqov buna ehtiyac olmadığını bildirmişdi.
XATIRLATMA
Mehman Hüseynov martın 3-də Suraxanı Rayon Məhkəməsinin hakimi Ceyhun Qədimovun çıxardığı hökmlə 2 il müddətinə azadlıqdan məhrum edilib. Onu Nəsimi Rayon Polis İdarəsinin rəisi Musa Musayevin xüsusi ittiham qaydasında şikayəti əsasında cəzalandırıblar.
M.Hüseynov yanvarın 9-da axşam saatlarında saxlanmışdı. Polisin qanuni əmrinə tabe olmamaqda günahlandırılan bloqqer bir gün sonra 200 manat cərimə edilməklə sərbəst buraxılmışdı.
Nəsimi Rayon Məhkəməsinin qərarında bloqqerin 200 manat cərimə edilməsi ilə yanaşı, onun şikayətinin prokurorluqda araşdırılması da öz əksini tapmışdı.
M.Hüseynov sərbəst buraxıldıqdan sonra polisdə işgəncələrə məruz qaldığını bildirmişdi.
Yanvarın 11-də isə M.Hüseynovun vəkili onun bədənində xəsarət yerlərinin və paltarında qan ləkələrinin əks olunduğu fotoları yaymışdı.
Ancaq Daxili İşlər Nazirliyi bloqqerə polisdə işgəncə verilməsi ilə bağlı deyilənləri əsassız saymışdı. Ardınca da Nəsimi Rayon Polis İdarəsinin rəisi Musa Musayev xüsusi ittiham qaydasında bloqqerdən şikayət etmişdi. Onun şikayətində M.Hüseynovun işgəncələrə məruz qalması ilə bağlı dedikləri polisə böhtan kimi dəyərləndirilirdi.
