Qazaxıstanın qərbindəki Manqıstau vilayətinin rəsmiləri həftəsonu Xəzər dənizinin sahilində nəsli kəsilməkdə olan 64 suiti və beş böyük nərə balığı tapıldığını deyirlər.
İddialar
Manqıstau regional balıqçılıq müfəttişliyinin mayın 16-da bildirdiyinə görə, heyvanların hamısı Şevçenko limanı yaxınlığında aşkarlanıb və tələf olma səbəbinin müəyyənləşdirilməsi üçün test olunmağa aparılıb.
Təxminən üç həftə öncə hakim orqanlar həmin ərazidə 94 ölü suitinin tapıldığını deyirdilər. O zaman açıqlanmış məlumata görə, heyvanların parçalanmış vəziyyəti onların üzərində hər hansı ekspertizanın aparılmasına imkan verməyib.
Mayın 4-də Qazaxıstanın Ekologiya naziri Serikqali Birekeşev suitilərin kütləvi tələfatına Şimal Xəzər Əməliyyat Şirkətinin fəaliyyətinin səbəb ola biləcəyi haqda iddiaları rədd edib. Bu şirkət Xəzərdə neft quyuları qazır.
70 mindən də az
Xəzər suitisi dünyanın ən böyük qapalı su hövzəsində yaşayan yeganə məməlidir.
Bu nəsli kəsilməkdə olan heyvanlar normadan artıq ovlanma, sənaye çirklənməsi riskilə üzləşiblər. 20-ci əsrin əvvəlində 1 milyondan çox suiti vardısa, indi onların sayı 70 mindən də azdır.
Təbiətin Mühafizəsi üzrə Beynəlxalq Birlik 2008-ci ildə suitini təhlükədə olan növ kimi tanıyıb. Suiti ötən il Rusiyadan nəsli kəsilməkdə olan növlərin Qırmızı Kitabına salınıb.
Xəzər dənizində nəhəng neft-qaz ehtiyatları var, sahil dövlətləri Rusiya, Qazaxıstan, Azərbaycan, İran və Türkmənistandır.
Hidrokarbon hasilatının yaratdığı çirklənmə və su səviyyəsinin azalması bir çox yerli növlərə təhdid yaradır, dənizin özünün gələcəyini riskə atır.
