Roma Papası Fransiskin dəfn mərasimi aprelin 26-da keçiriləcək.
O, son 100 ildən artıq müddətdə Vatikanın Müqəddəs Pyotr bazilikasının məzarında dəfn olunmayan ilk Papa olacaq. Papa Fransisk son vəsiyyətində Romadakı Müqəddəs Məryəm Böyük bazilikasında dəfn olunmaq istədiyini bildirib.
O, sələflərindən fərqli olaraq, sadə taxta tabutda dəfn olunmasını vəsiyyət edib. Əvvəlki papalar ənənəyə uyğun olaraq sərv ağacı, qurğuşun və palıddan hazırlanmış üçlaylı tabutda dəfn edilirdilər.
Sadəliyə üstünlük verməsi ilə tanınan pontifik bəzəksiz bir məzar və üzərində sadəcə "Franciscus" yazısının olmasını istəyib.
21 aprel
Roma Papası Fransisk vəfat edib
Roma Papası Fransisk 88 yaşında vəfat edib.
Papa bu yaxınlarda "ikitərəfli pnevmoniya" diaqnozu ilə Roma xəstəxanasında uzun müddət müalicə almışdı.
Aprelin 20-də, Pasxa günündə o, Müqəddəs Pyotr meydanında izdiham qarşısında görünüb və eyni gündə səhər ABŞ-nin vitse-prezidenti Ceyms Devid Vens ilə görüşüb.
O, 2013-cü ilin martında sələfi Papa XVI Benediktin tarixi istefasından sonra seçilərək Katolik Kilsəsinə 12 il rəhbərlik edib.
Fransisk Amerika qitəsindən seçilmiş və III Qriqoridən (təxminən 1000 il əvvəl) sonra ilk avropalı olmayan Papa idi.
Yeni Papanın seçilməsi yaxın günlərdə Fransiskin dəfn mərasimi ilə başlayacaq və Sistin Kilsəsinin bacasından çıxacaq ağ tüstü ilə tamamlanacaq. Ağ tüstü yeni Papanın seçildiyini xəbər verir.
Həyatı və missiyası
Roma-Katolik Kilsəsinin 266-cı Papası olan Fransiskin əsl adı Xorxe Mario Berqolyodur. O, Argentinada, Buenos-Ayresdə doğulub.
İtaliyalı immiqrantların oğlu olan Berqolyo 1958-ci ildə Yezuitlər ordeninə qoşulmazdan əvvəl kimya texniki kimi çalışıb.
O, 1969-cu ildə keşiş təyin edilib və 1973–1979-cu illərdə Argentinada Yezuitlər ordeninin regional rəhbəri olub.
1998-ci ildə Buenos-Ayres arxiyepiskopu təyin edilib. Üç il sonra isə o, Papa II İohann Pavel tərəfindən Kardinallar Kollecinə yüksəlib.
2013-cü ildə Papa XVI Benediktin istefasından sonra Papa seçilən Fransisk təvazökarlığa və kasıblara olan bağlığını ifadə etmək üçün Assizli Müqəddəs Fransiskin şərəfinə "Fransisk" adını seçib.
O, Vatikanın maliyyə sistemini islahat etmək və kilsə daxilində ruhanilərin cinsi istismarı ilə bağlı iddiaları aradan qaldırmaq üçün səylər göstərib.
Son illərində Papa Fransisk bir sıra sağlamlıq problemləri ilə üzləşmişdi. 2021-ci ildə "divertikulit" diaqnozu ilə bağırsaq əməliyyatı keçirmiş, 2023-cü ildə isə yırtıq əməliyyatı olunmuşdu. O, həmçinin xroniki diz və bel ağrılarından əziyyət çəkir, hərəkət üçün tez-tez əlil arabasından istifadə edirdi.
Bütün bu çətinliklərə baxmayaraq, o, sıx qrafikini qoruyur, pastoral fəaliyyətlərini və beynəlxalq səfərlərini davam etdirirdi.
2025-ci ilin əvvəlində Papa Fransisk respirator infeksiya diaqnozu ilə xəstəxanaya yerləşdirilmişdi. Bu infeksiya sonradan ikitərəfli sətəlcəmə çevrilmişdi.
