Gürcüstan müxalifətinin əsas telekanalı Rustavi 2-nin yeni sahibi teleşirkəti satmaq niyyətini bildirib.
Kabir Khalvashi-nin bu qərarı barədə məlumat Rustavi-2-nin internet saytında avqustun 12-də dərc olunub.
Bu barədə ayrıca bəyanatında Khalvashi deyib ki, Rustavi-2 yığılıb qalmış borclarına görə “fəlakətli” maliyyə vəziyyətindədir və o “şirkəti düşdüyü dərin böhrandan çıxara bilmir”.
Khalvashi telekanalın bu vəziyyətə düşməsinə görə onun keçmiş direktoru Nika Gvaramianı ittiham edib.
Khalvashi-nin bu bəyanatından bir ay əvvəl Avropa İnsan Haqları Məhkəməsi (AİHM) Gürcüstan Ali Məhkəməsinin Rusitavi-2 telekanalının köhnə sahibliyinin bərpasına dair 2017-ci il tarixli hökmünü qüvvədə saxlamışdı.
Söhbət indiki hökumətə yaxınlığı ilə tanınan Khalvashi-dən gedirdi.
AİHM-in qərarından dərhal sonra Khalvashi Gvaramianı vəzifəsindən kənarlaşdırmışdı.
Tənqidçilər deyirlər ki, Khalvashi-nin qərarı hökumətin gələn il keçirləcək parlament seçkisindən əvvəl fərqli siyasi düşüncəni boğmaq cəhdlərinin bir hissəsidir.
Avqustun 12-də habelə Rustavi-2 telekanalının həmtəsisçisi Erosi Kitsmarishvili-nin dul xanımı teleşirkətin səhmlərinin 30 faizinə məhkəmə iddiası qaldırıb.
Rustavi-2-nin başqa həmtəsisçiləri - Davit Dvali və Jarji Akimidze avqustun 12-də bildiriblər ki,Khalvashi-nin qərarı telekanalın sahibliyi üstündə hüquqi çəkişməni mürəkkəbləşdirəcək.
Dvali və Akimidze habelə deyiblər ki, Khalvashi telekanalı satmaqla onun hakim Gürcü Arzusu partiyasının sədri Bidzina Ivanishvili-yə yaxın birisinin nəzarətinə keçməsini istəyir.