Gecə uzun sürən döyüşlərdən sonra Kiyev SES geri alınıb

Ukrayna hərbçiləri gecə uzun sürən döyüşlərdən sonra Kiyev su elektrik stansiyasını geri alıblar. Energetika Nazirliyinin məlumatına görə, stansiya tamamilə Ukraynanın nəzarəti altındadır. Texniki heyət sığınacağı tərk edərək işlərinə qayıdıblar. Fevralın 26-sı səhər saat 8:30-a olan məlumata görə, SES normal rejimdə işləyir.

Peyk görüntüləri Belarusun cənubunda rus qoşunlarının cəməlşdiyi göstərir

UNİAN-ın müxbiri xəbər verir ki, təxminən 100 ədəd Rusiya zirehli texnikasından ibarət kolonna Vışqorodski rayonundan Kiyevə doğru hərəkət edir.

Avadanlığın yan tərəflərində - ağ "V" hərfi, hərbçilərin qollarında - ağ lentin olduğu bildirilir. Məlumatda qeyd olunur ki, zirehli texnika koloniyası Kozaroviçi kəndindən keçir.

"Hələlik dayanıblar. Oradan iki istiqamət var: ya şimala, ya da İrpin çayın mənsəbindəki nasos stansiyasının körpüsü ilə Kiyevə. Tanklar yoxdur. Sürətli zirehli transportyorlardır," deyə müxbir xəbər verir. Daha əvvəl belaruslu bloger Anton Motolko yazıb ki, ağ rəngli “V” identifikasiya işarəsi olan çoxlu sayda Rusiya hərbi texnikası Belarus ərazisindən keçərək Ukrayna sərhədinə doğru hərəkət edir. Peyk görüntüləri Belarusun cənubunda rus qoşunlarının böyük qruplaşmasını göstərir

Səhər saatlarında Ukrayna Prezident Aparatı rəhbərinin müşaviri Mixail Podolyak bildirib ki, Ukrayna paytaxtında vəziyyət 100% nəzarətdədir və Rusiyanın şəhəri ələ keçirmək şansı yoxdur.

Rusiya Müdafiə Nazirliyi isə iddia edir ki,Rusiya qoşunları Ukraynanın Melitopol şəhəri üzərində tam nəzarəti ələ keçiriblər.

Fevralın 25-i axşam saatlarında Ukrayna hakimiyyəti hərbçilərin şəhərin yalnız yarısına nəzarət etdiyini bildirib.

Zelenski: Biz silahı yerə qoymayacağıq, çünki...

Fevralın 26-sı səhər saatlarında Ukrayna prezidenti Volodimir Zelenskinin xalqa müraciəti yayılıb.Paytaxt Kiyevin Bankova küçəsində səhər saatlarında çəkildiyi qeyd olunan videoda Zelenski deyir ki, orduya silahı yerə qoymağı xahiş etdiyi, təxliyyənin getdiyi barədə yalan xəbərlərə inanmamağı xahiş edir.

"Deməli, mən buradayam. Biz heç bir silahı yerə qoymayacağıq. Dövlətimizi müdafiə edəcəyik, çünki silahlarımız bizim həqiqətimizdir. Bizim həqiqətimiz isə budur ki, bura bizim torpağımız, ölkəmiz, övladlarımızdır. Biz hamını müdafiə edəcəyik. Sizə demək istədiyim budur. Yaşasın Ukrayna!"

NATO Çevik Cavab Qüvvəsini hazırlıq vəziyyətinə gətirir

NATO-nun baş katibi Yens Stoltenberq deyib ki, ABŞ prezidenti Co Bayden və onun alyans üzrə müttəfiqləri təşkilatın Çevik Cavab Qüvvəsini Rusiyanın Ukraynaya hücumu ilə bağlı ilk dəfə olaraq hərəkətə gətirmək barədə razılaşma əldə ediblər.

Stoltenberq bildirib ki, bundan məqsəd alyansın şərq cinahındakı müttəfiqlərin mümkün hücumdan müdafiə edilməsidir.

NATO dövlət başçılarının fevralın 25-də videobağlantı ilə keçirdikləri sammitdən sonra danışan Stoltenberq bu qüvvənin sayı barədə dəqiq rəqəm səsləndirməsə də, deyib ki, Çevik Cavab Qüvvəsinə quru, hava və dəniz elementləri daxildir.

Bu qüvvə ümumilikdə 40 min əsgərdən ibarətdir, lakin alyansın rəhbəri bildirib ki, bu potensialın heç də hamısından söhbət getmir.

NATO-nun Çevik Cavab Qüvvəsinin bəzi bölümləri Birgə Yüksək Hazırlıq Qüvvəsi adı ilə tanınır.

Dünyanın ən böyük hərbi alyansı olan NATO bundan əvvəl Baltik ölkələri – Estoniya, Latviya və Litva, habelə Polşada 5 min əsgər yerləşdirib. Son üç ayda bu bölgənin müdafiəsi qat-qat gücləndirib.

Fevralın 25-də keçirilən sammitin yekun bəyanatında Rusiyadan “bu mənasız müharibəyə son qoyması, hücumu dərhal dayandırması, bütün qüvvələrini Ukrayna ərazisindən çıxarması, təcavüz yolundan dönüb dialoq yoluna qayıtması” tələb olunub.

Stoltenberq deyib ki, “Kremlin son məqsədi Ukrayna ilə məhdudlaşdmır”.

O deyib ki, Rusiya açıq şəkildə Avropada təhlükəsizliyə meydan oxuyur.

Alyansın rəhbəri əmin edib ki, dünya Rusiya və Belarusdan haqq-hesab tələb edəcək.

O əlavə edib ki, “Rusiya təcavüzkar, Belarus onun köməkçisidir”.