Hərbi poliqonun bombalanması nəticəsində 35 nəfər həlak olub, 134 nəfər yaralanıb
Martın 13-də Polşa ilə sərhəddin 25 km-də Rusiya aviyasiyasının Ukraynanın Yavoriv hərbi poliqonuna endirdiyi zərbələr nəticəsində 35 nəfər ölüb, 134 nəfər yaralanıb.
Bu barədə Lvov vilayəti administrasiyası məlumat yayıb.
Məlumatlara görə, Rusiya təyyarələri poliqona 30 raket atıb. Onlardan bəzilərinin hava hücumundan müdafiə sistemləri vasitəsi ilə vurulduğu bildirilir. Rusiya təyyarələrin Saratovdan Qara dəniz hövzəsinə qalxaraq oradan zərbələr endirdiyi bildirilir.
Hücumdan sonra Ukraynanın müdafiə naziri Oleksiy Reznikov NATO-nu dərhal ölkə səmasını bağlamağa çağırıb.
Yerli KİV-lərin verdiyi məlumata görə, martın 13-də Rusiya ordusunun Nikolayev şəhərini bombalanması nəticəsində 9 nəfər həlak olub.
Rusiyada uçaqların müharibə təbliğatına cəlb olunması ilə bağlı məlumatlar yayılır
Məmurlar, büdcə işçiləri və Kremlə loyal olan müəssisələr bütün gücü ilə Rusiyanın Ukraynaya təcavüzünü dəstəkləryən addımlar atmaqdadılar. Belə müəssələrdən biri Yakutiyadakı quşçuluq fabrikidir. Fabrikin instaqram səhifəsində qeyd olunur ki, bu gündən satışa üzərində "#ZaRussia" seriyalı yumurta buraxdılar. “Limited Eggs” bu gün satışa çıxarılacaq. "Məhsul istənilən masanı bəzəyəcək", - şirkətin Instagram səhifəsində deyilir.
Bundan başqa Rusiyada uşaqların da müharibə təbliğatına cəlb edilməsini göstərən görüntülər yayılmaqdadır. Belə “vətənpərvər” aksiyalarında Rusiyanın Ukraynada başladığı müharibənin simvol hesab edilən "Z" hərfi ilə düzülmüş uşaqların fotosu geniş yayılıb. BBC-nin jurnalisti Andrey Zaxarova özünün tvitter səhifəsində uşağların belə təbliğata qoşulmasını əks etdirən fotolar paylaşıb.
"Z" hərfi -Ukraynada döyüşən Rusiya hərbçilərinin maşınlarını işarələmək üçün istifadə etdiyi iki işarədən biridir. İkincisi isə "V" hərfidir. Bu hərflərin dəqiq mənası məlum deyil, onların “Qərb” və “Şərq” olduğu güman edilir. Müharibəni təbliğ etmək üçün Rusiyada "Z" hərfindən fəal şəkildə istifadə olunmağa baçlanılıb, Bu hərflər Ukraynaya yeridilərn hərbi texnikanın və əsgər formalarının üzərində əks olunub.
Moskvanın hərbi ritorikasını tənqid edənlər bu işarəni “yeni svastika” adlandırırlar.
Çerniqovda 9 mərtəbəli bina vurulub, ölən və yaralanlar var
Çerniqovda hava hücumu nəticəsində doqquz mərtəbəli hostel binasına ziyan dəyib. Ukrayna Dövlət Fövqəladə Hallar Xidmətinin məlumatına görə, bir nəfər ölüb, bir nəfər yaralanıb.
Hava hücumu binanın yeddi mərtəbəsinə ziyan vurub. Hadisə yerində çalışan yanğınsöndürənlər binadan 7 nəfəri təxliyə edə biliblər.
Belarus sakinləri: Belarus morqları rus əsgərlərinin meyidlərilə doludur
Ukraynada döyüşdə həlak olan rus əsgərlərinin cəsədləri Belarusda morqları doldurur. Bu məlumatı AzadlıqRadiosuna yerli sakinlər deyiblər.
Şahidlərin dediyinə görə, döyüşdə ölən rus əsgərləri yük maşınları ilə morqlara gətirilir, daha sonra qatar və ya təyyarə ilə Rusiyaya göndərilir.
Sakinlər cəsədlərin Rusiyaya qaytarılmaq üçün Mazırda qatara yükləndiyini görməyin dəhşətini təsvir ediblər.
“Cəsədlərin sayı inanılmaz dərəcədə çox idi. Mozır stansiyasında insanlar qatara mindirilən cəsədlərin sayından sadəcə şoka düşüblər”, – Mazırda yerli sakin AzadlıqRadiosuna belə deyib.
Yerli sakinlərin sözlərinə görə, Homel və Naruliyadakı meyitxanalar da doludur. Belarus həkimləri ölən və yaralanan rus əsgərləri haqqında məlumat yayarkən tutulsalar, işini itirəcəkləri ilə hədələniblər.
ABŞ rəsmiləri iki həftədir davam edən müharibədə indiyədək bir neçə min rus əsgərinin həlak olduğunu təxmin edir. Ukrayna rəsmi mənbələri isə müharibə başlayandan bəri Rusiyanın 12 mindən çox canlı qüvvə itirdinin bildirir. Xarici jurnalistlərlə görüşdə Ukrayna prezidenti Zelenski Rusiya işğalına qarşı döyüşlərdə Ukraynanın 1300 hərbçi itirdiyini deyib. Rusiya isə öz itkiləri ilə bağlı bir dəfə məlumat verib. İtkilərin 500-ə yaxın olduğunu bildirib.