Rusiya neft bazasının Ukrayna tərəfindən vurulduğunu deyir
Belqorod rəhbərliyinin məlumatına görə, aşağı hündürlükdə uçan iki Ukrayna helikopteri Rusiya ərazisinə daxil olaraq bazanı atəşə tutublar. Amma bu məlumatı, hələlik, müstəqil mənbələr tərəfindən təsdiqləmək mümkün olmayıb.
Kiyev Dnestryanıda Rusiya qoşunlarının aktivləşdiyini bildirir
Ukrayna Silahlı Qüvvələrinin Baş Qərargahı iddia edir ki, Moldovanın separatçı Dnestryanı bölgəsindəki Rusiya qoşunları və qondarma qurumun hərbi bölmələrinin aktivləşdirlməsi elan edilib. Məlumatda vurğulanır ki, bu hərəkətlilik həmin hərbi qüvvələrin Ukraynaya hücuma hazırlıqları ilə bağlı ola bilər.
"158 uşaq həlak olub, 254 uşaq yaralanıb"
Ukrayna Baş Prokurorluğu: Müharibə başlayandan indiyədək 158 uşaq həlak olub, 254 uşaq yaralanıb.
Böyük Britanıyanın Müdafiə Nazirliyi Ukraynadakı son vəziyyəti qiymətləndirir
Böyük Britaniyanın Müdafiə Nazirliyi aprelin 2-də Ukraynadakı vəziyyətlə bağlı bəzi qiymətləndirmələri paylaşıb. Məlumatda bildirilir ki, Ukrayna qüvvələri Rusiya qoşunlarını Kiyev ətrafından çıxarmaqla irəliləyirlər. Şimal-qərb istiqamətində Ukrayna qoşunlarının İrpendən Buça və Qostomelə doğru irəliləmək cəhdləri davam edir. Məlumatda Rusiya qoşunlarının Qostomel aerodromundan çıxarıldığı və şərq oxu boyunca Ukrayna ordusunun bir neçə kəndi geri aldığı bildirilir. Həmçinin vurğulanır ki, şərqdə Ukrayna qüvvələri şiddətli döyüşlərdən sonra Xarkovun şərq hissəsində əsas yolu ələ keçiriblər.