Deputat: "Adekvat cavab vermək lazımdır"
"Azərbaycana bundan sonra təzyiqlər artacaq. Ona görə də bu siqnallara adekvat cavab vermək lazımdır".
Bunu noyabrın 26-da Milli Məclisin plenar iclasında deputat Əli Məsimli deyib.
Deputat qeyd edib ki, bu qətnamədən qorxmaq lazım deyil. Onun fikrincə, Fransanın üzərinə getmək lazımdır ki, ATƏT-in Minsk qrupu həmsədrliyindən imtina etsin.
"Biz Fransaya qarşı müharibə elan edəsi deyilik". Bunu isə Milli Məclisin iclasında hakim Yeni Azərbaycan Partiyasından (YAP) olan deputat Məlahət İbrahimqızı deyib.
Ancaq onun sözlərinə görə, münasibətlərə yenidən baxılmalıdır.
Milli Məclis Senata etiraz mətni hazırlayır
Azərbaycan Milli Məclisində Fransa Senatının qəbul etdiyi qətnaməyə etiraz bəyanatının mətnini hazırlamaq üçün komissiya yaradılıb.
Bununla bağlı bu gün, noyabrın 26-da Milli Məclisin iclasında qərar qəbul olunub.
Komissiya Səməd Seyidov (sədr), Cavanşir Feyziyev, Əminə Ağazadə və Fazil Mustafadan ibarətdir.
Azərbaycan Fransa Senatının qətnaməsinə münasibət bildirib
Azərbaycan Xarici İşlər Nazirliyi (XİN) Fransa Senatında qəbul edilmiş “Dağlıq Qarabağ Respublikasının tanınması zərurəti” adlı qətnamə təklifinə münasibət bildirib.
Aşıqlamada qeyd edilib ki, Azərbaycanın Fransadakı səfiri qətnamənin səsverməsindən bir gün öncə (noyabrın 24-də) Senat üzvləri qarşısında çıxış edib və əks olunan birtərəfli və həqiqətə uyğun olmayan məqamlarla bağlı ətraflı məlumat təqdim edib:
“Buna rəğmən Senat tərəfindən tamamilə qərəzli qətnamənin qəbul edilməsi, yalnız təxribat kimi qiymətləndirilə bilər. Görünür, Fransa erməniləri münaqişə mövzusundan seçki məqsədləri üçün geniş şəkildə istifadə edirlər.”
XİN vurğulayır ki, Senatın qəbul etdiyi qətnamənin hüquqi qüvvəsi yoxdur:
“Lakin qətnamənin siyasi məna kəsb etdiyini nəzərə alaraq, vasitəçi mandatı daşıyan bir ölkənin belə bir qətnamə ilə çıxış etməsi ölkənin bitərəfliliyini ciddi şübhə altına alır. Bu, həmçinin Azərbaycan ictimaiyyətində Fransanın ədalətli vasitəçi nüfuzuna xələl gətirir.”
Açıqlamada habelə qeyd edilir ki, Fransanın münaqişənin həlli ilə bağlı rəsmi mövqeyini dövlətin yüksək səviyyəli rəsmiləri, səsləndirib:
“Fransa Azərbaycanın ərazi bütövlüyünü dəstəkləyir və bu mövqe istər ikitərəfli çərçivədə, istərsə də Avropa İttifaqı ilə imzalanan sənədlərdə öz əksini tapıb.”
XİN hesab edir ki, "Fransa Senatının qərəzli qətnamələr qəbul etmək əvəzinə bölgədə sülh, sabitlik və tərəqqiyə xidmət edən fəaliyyətlə məşğul olması həm Fransanın maraqlarına cavab verər, həm də bölgənin dayanıqlı inkişafına yardımçı olardı".
Fransa Senatı Dağlıq Qarabağın müstəqilliyini tanımağa çağıran qətnamə qəbul etdi
Fransa Senatı Dağlıq Qarabağdakı separatçı rejimin “müstəqilliyinin” tanınması barədə qətnamə qəbul edib.
Bu da qeyd olunur ki, bu qətnamənin qəbuluna 305 millət vəkili səs verib. Qətnamənin əleyhinə bir senator səs verib. 30 senator bitərəf qalıb.
Fransa hökumətində Avropa məsələləri naziri Jan Baptist Lemoyn bu qətnamənin səsə qoyulmasından əvvəl Senata mürəciət edib.
O bildirib ki, Fransa hökuməti sözü gedən qətnaməni dəstəkləmir və onun qəbulu heç bir tərəf üçün xeyirli deyil.