Fransa Senatında Qarabağın müstəqilliyi səsverməyə çıxarılır
Fransa Senatı Dağlıq Qarabağın müstəqilliyinin tanınması barədə qətnaməyə baxacaq.
Bu barədə Senatın saytında bildirilir.
Sənədin müəlliflərindən biri-senator Brüno Retayo qətnamənin noyabrın 25-də müzakirə olunacağını bəyan edib.
Senatın qətnamələri tövsiyə xarakterlidir, hökumət onları icra etməyə borclu deyil.
Lavrov və Zərifin Qarabağı müzakirə edəcəyi gözlənilir
Rusiya və İranın xarici işlər nazirləri Sergey Lavrov və Məhəmməd Cavad Zərif noyabrın 23-də Moskvada həm də Dağlıq Qarabağ məsələsini müzakirə edəcəklər.
Bu barədə məlumatı Rusiya XİN-in sözçüsü Mariya Zaxarova verib:
“Noyabrın 23-də İran xarici siyasət idarəsinin rəhbəri Moskvada növbəti səfərdə olacaq. Bu səfər zamanı o Rusiya xarici işlər naziri Sergey Lavrovla görüşəcək. Görüş zamanı Dağlıq Qarabağ, İranın nüvə proqramında birgə hərtərəfli iş, Suriya, Əfqanıstan və Fars körfəzindəki vəziyyət üzrə fikir mübadiləsinin davam etdiriləcəyi gözlənilir”.
Rusiya və Fransa Qarabağı müzakirə ediblər
Rusiya və Fransa xarici işlər nazirləri Sergey Lavrov və Jan İv Le Drian noyabrın 19-da telefonla Dağlıq Qarabağı müzakirə ediblər.
Rusiya Xarici İşlər Nazirliyinin rəsmi saytında dərc edilmiş məlumatda deyilir ki, tərəflər Rusiya, Azərbaycan və Ermənistan liderləri arasında noyabrın 9-da imzalanmış razılaşmanın həyata keçirilməsinin mühümlüyünü vurğulayıblar.
İki nazir habelə Beynəlxalq Qırmızı Xaç Komitəsinin, BMT Qaçqınlarla İş üzrə Ali Komissarlığının və UNESCO-nun sülhməramlı proses əsnasındakı fəaliyyətinin mühümlüyünü qeyd edib.
Lavrov və Le Drian razılaşıblar ki, hazırda ən mühüm vəzifə köçkün və qaçqınların daimi yaşayış yerlərinə təhlükəsiz qayıdışının, regiondakı bütün iqtisadi və nəqliyyat kommunuikasiyalarının açılmasının və mülki infrastrukturun bərpasının təmin edilməsidir.
Rusiya və Fransa xarici işlər nazirləri Dağlıq Qarabağ böhranının ATƏT-in Minsk qrupunun prinsipləri çərçivəsində və Azərbaycan və Erməni xalqlarının bərabər hüquqları əsasında tənzimlənməsinə dair fikir mübadiləsi aparıblar.
Bu söhbət zamanı həm də Ukraynadakı vəziyyət müzakirə olunub. Sergey Lavrov Paris və Berlinin Kiyev hakimiyyətini onun Minsk razılaşmalarını pozmasında himayə etmələrinin yolverilməzliyini vurğulayıb.
Azərbaycan ordusu Ağdama daxil olub
Azərbaycan ordusunun bölmələrinin noyabrın 20-də Ağdam rayonuna daxil olduğu bildirilir.
Bu barədə Azərbaycan Müdafiə Nazirliyi (MN) məlumat yayıb.
Məlumatda yazılıb ki, Azərbaycan prezidenti, Ermənistan baş naziri və Rusiya Federasiyasının prezidentinin imzaladığı üçtərəfli bəyanata əsasən, Azərbaycan ordusunun bölmələri noyabrın 20-də Ağdam rayonuna daxil olub. "Ağdam rayonundan foto və videomateriallar gün ərzində təqdim olunacaq", - məlumatda qeyd edilir.