Lavrov əsir və cəsədlərin mübadiləsi haqda
Rusiya Dağlıq Qarabağ münaqişəsi tərəflərinin hərbi əsirlərin və cəsədlərin mübadiləsi prosesini məqsədli yubatmasını müşahidə etmir. Bunu Rusiyanın Xarici İşlər naziri Sergey Lavrov dekabrın 1-də KTMT-nin Xarici İşlər Nazirləri Şurasının iclasının yekunlarına dair mətbuat konfransında deyib.
Lavrov prosesin irəli getməsini əngəlləyən obyektiv çətinliklərin olduğunu qeyd edib.
"Prosesi yubadan məqsədli addımlardan danışmaq çətindir, biz bunu görmürük. Ancaq tezliklə həll olunacağına ümid etdiyim obyektiv çətinliklərin mövcudluğu faktdır", – o vurğulayıb.
Lavrov qeyd edib ki, relyefi, hərbi əməliyyatların necə başladığını nəzərə alaraq, atəşkəsdən dərhal sonra bu məsələlərlə məşğul olmaq çətin idi, üstəlik, itkin hesab edilənlərin dəqiq siyahıları da yox idi.
"Ümid edək, beynəlxalq strukturun mütəxəssislərini cəlb etməklə məsələ sürətlə irəliləyəcək. Bizim sülhməramlılar da imkan daxilində buna kömək edəcəklər", – rusiyalı nazir deyib.
Rusiya-Türkiyə birgə müşahidə mərkəzi necə işləyəcək
Dekabrın 1-də Türkiyənin Müdafiə Nazirliyi Rusiya ilə Qarabağda atəşkəsə Birgə Müşahidə Mərkəzi barədə protokol imzalandığını açıqladı. Rusiya Müdafiə Nazirliyinin rəsmiləri də informasiyanı təsdiqləyərək bəzi detalları açıqlayıblar.
Nazirliyin rəsmisi İqor Konaşenkovun sözlərinə görə, imzalanmış sənəddə mərkəzdə Rusiya və Türkiyə tərəfdən eyni sayda əməkdaşların olması nəzərdə tutulub.
"Təşkilat strukturunda Rusiya və Türkiyə personalının sayı bərabər olacaq", – o deyib.
Rusiya, Azərbaycan və Ermənistan liderlərinin noyabrın 10-da açıqladığı razılaşmaya əsasən, Dağlıq Qarabağda döyüşlər dayandırılıb, tərəflər tutduqları mövqelərdə qalıblar və təmas xəttinə Rusiya sülhməramlıları yerləşdirilib. Üçtərəfli bəyanatda Türkiyə hərbçilərinin regiona gələcəyi barədə müddəa yer almasa da, prezident İlham Əliyev xalqa müraciətində bu barədə danışmışdı.
Sonradan verilən açıqlamalarda Türkiyə hərbçilərinin ermənilərin nəzarətində qalan ərazilərdən kənar qalacağı bəlli oldu. Rusiya rəsmiləri dəfələrlə qeyd ediblər ki, Qarabağda Türkiyə hərbçiləri yerləşdirilməyəcək. Rusiya prezidenti Vladimir Putin ötən ay deyirdi ki, "erməni tərəfini təmas xəttində türk əsgərinin olması ilə qıcıqlandırmaq nəyə lazımdır? Mənə belə gəlir ki, bunu prezident Ərdoğan da yaxşı başa düşürdü. Buna görə də biz razılaşdıq ki, Türkiyə Azərbaycanın tərəfində atəşkəsə nəzarət edəcək. Biz bu işi Türkiyə ilə birgə görəcəyik".
Putin: "Vəzifəmiz – Paşinyanı dəstəkləməkdir"
Rusiya prezidenti Vladimir Putin hesab edir ki, hazırda Dağlıq Qarabağda atəşkəsin qorunmasının icrası üçün Ermənistanın baş nazirini və onun komandasını dəstəkləmək lazımdır. Bu haqda AzadlıqRadiosunun Ermənistan xidməti xəbər yayıb.
Putin bəyanatı KTMT-nin onlayn iclasında verib. Onun sözlərinə görə, Ermənistan rəhbərliyi, şəxsən hökumətin bacısı ölkə üçün çox çətin, amma gərəkli qərarlar verməli olublar. O hesab edir ki, bunlar ağrılı olmaqla yanaşı, həm də vacib qərarlar idi, baş nazirdən böyük cəsarət tələb edirdi.
"Bu, aydın məsələdir və bu iclasa qatılan hər kəs bu cür qərarların qəbulunun məsuliyyət dərəcəsini anlayır. O bu məsuliyyəti üzərinə götürdü. İndi bizim vəzifəmiz həm baş naziri, həm də onun komandasını dəstəkləməkdir ki, dinc həyat qurulsun, qəbul olunan bütün qərarlar yerinə yetirilsin, çətin vəziyyətdə olan şəxslərə kömək göstərilsin", – Putin vurğulayıb.
Putin daha sonra deyib ki, KTMT-nin məsuliyyət zonasına daxil olan ərazidə vəziyyət problemsiz deyil və ümumi olaraq həll olunmayıb. "Dağlıq Qarabağ zonasında qan tökülməsini dayandırmaq, hərtərəfli atəşkəs əldə etmək və sabitləşmə prosesinə başlamaq üçün Rusiyanın fəal vasitəçilik cəhdləri tələb olundu. Biz, eyni zamanda, ATƏT-in Minsk qrupunda, özəlliklə onun həmsədrləri Rusiya, Birləşmiş Ştatlar və Fransa arasında əldə olunmuş əsas razılaşmalara əməl etdik", – Putin vurğulayıb.
Ermənistan, Azərbaycan və Rusiyanı liderləri noyabrın 9-da Dağlıq Qarabağda atəşkəslə bağlı üçtərəfli bəyanat imzalayıblar.