ABŞ və Avropa ölkələri Rusiyaya müraciət edərək Cənubi Osetiyanın və Abxaziyanın müstəqilliyini tanımamağa çağırıblar. Amerika prezidenti Corc Buş Rusiya parlamentinin hər iki palatasının prezidentə müraciətindən narahat olduğunu bildirib.
Avqustun 26-da Rusiya parlamentinin hər iki palatası Abxaziya və Cənubi Osetiyanın müstəqilliyini tanımaq xahişi ilə Dmitri Medvedevə müraciət edib.
Amerika prezidenti isə Rusiyanı Gürcüstanın ərazi bütövlüyünə hörmət etməyə çağırıb.
Almaniya kansleri Angela Merkel isə deyib ki, Rusiya prezidentinin belə bir sənəd imzalamayacağına ümid edir. Çünki separatçı regionların müstəqilliyinin tanınması regionda gərginliyi artıracaq.