Avropa Şurası Nazirlər Komitəsinin AQO Monitorinq Komitəsi Bakıda səfərdədir. Missiyanın məqsədi Azərbaycanın Avropa Şurası qarşısında öhdəliklərini necə yerinə yetirməsini araşdırmaqdır.
Avropa Şurasının Bakıdakı İnformasiya Ofisindən verilən məlumata görə, iyunun 13-də komitə üzvləri Müsavat Partiyasının başqanı İsa Qəmbər, Azadlıq bloku liderləri ilə görüşüb.
Səfərin gündəliyində dəyişiklik edilib. Belə ki, prezident İlham Əliyevlə görüş iyunun 14-ə nəzərdə tutulsa da, bu günə keçirilib. İyunun 14-də mətbuat konfransı nəzərdə tutulmuşdu, ancaq bu tədbirin keçirilməsi də ölkə başçısıyla bugünkü görüşün nəticələrindən asılı olacaq. AQO qrupu üzvləri yerli hüquq müdafiəçiləri ilə də görüşəcəklər.
İyunun 26-dan 30-dək AŞPA-nın növbəti sessiyasında Azərbaycanın bu qurum qarşısında öhdəliklərinə dair qısa hesabat dinlənəcək.