-
Rinqdə qulaq dişləyən, rəfiqəsini zorlayan qalmaqalçı Tyson hara, kitab oxumaq hara - kimsə düşünə bilər.
Amma boks üzrə keçmiş dünya çenpionu Mike Tyson fəlsəfə həvəskarıdır, ən çox sevdiyi filosof isə Nietzsche-dir.
“Wall Street Journal” yazır ki, 48 yaşlı Tyson fəlsəfəyə olan sevgisini “filosofların çoxunun siyasi cəhətdən korrekt olmaması, yəni status-kvoya, hətta allaha üsyan etməsi” ilə bağlayır. “Nietzsche dəlidir, onu doğrudan da anlamaq üçün IQ-ün (intellekt əmsalı – red.) azı 300 olmalıdır”.
“Allah ölüb” deyən Nietzsche-dən başqa Tyson danimarkalı filosof Kierkegaard-u oxuyur.
Konkret olaraq, Gordon Marino-nun redaktəsi ilə nəşr edilmiş "The Quotable Kierkegaard" (Kierkegaard-dan sitatlar) kitabını. Danimarkalı filosof da daim xristianlığı tənqid edib, din adamları ilə münaqişədə olub.
Friedrich Wilhelm Nietzsche
“Filosoflardan başqa mən mütəmadi tarix kitabları oxuyuram” – deyir Tyson: “Müdrik adamlardan biri yaxşı deyib ki, keçmiş sadəcə, məzəli geyimlərə bürünmüş indidir”.
Boksçu Makedoniyalı İsgəndər haqda oxumağı sevir. Məsələn, Sean Patrick-in “Böyük İsgəndər: Dünyanı fəth etmiş makedoniyalı” kitabını.
Makedoniyalı İsgəndərin “Kölgədə keçən uzun ömürdənsə şöhrət içində keçən qısa ömür yaxşıdır” sözləri Tyson üçün bir deviz olub.New York-un ən kriminallaşmış rayonlarından olan Brooklyn-dən (Brownsville) çıxan, 12 yaşınacan polis tərəfindən 37 dəfə saxlanmış Tyson deyir:
“Mən həbsxanaya düşüb-çıxan bir adam kimi ya gülləyə tuş gəlib ölməyimi, ya da residivist oğru kimi günümün davalarda keçməsini gözləməliydim”.
O ki qaldı İsgəndərin şəxsiyyətinə...
Napoléon Bonaparte və Joséphine de Beauharnais
“İsgəndər, Napoleon, Çingiz xan – onların hamısı ana uşağı olublar. Məhz buna görə İsgəndər daim hücumda olub. Çünki anasının hökmran olduğu evinə qayıtmaq istəmirdi”.
Boksçu məktub oxumağın da həvəskarıdır: “Napoleon-un Josephine-ya sevgi məktublarını oxuyun, görəcəksiniz ki, məhəbbət əslində dəliliyin bir formasıdır”.
İngilis yazıçısı Virginia Woolf-un, paltarının ciblərinə daş doldurub özünü suda boğmasından əvvəl ərinə yazdığı məktubu da oxuyub Tayson:
“Mənim yüngül şeylər oxumaqla aram yoxdu. Mən yüngül mövzuları xoşlayan oğlanlardan deyiləm”.