«Prezident mənim diffamasiya ilə bağlı maddələrin Cinayət Məcəlləsindən çıxarılması, bu məsələnin Mülki Məcəllə əsasında həllinə dair fikirlərimi çox diqqətlə izlədi. Mən ona dedim ki, əlbəttə, biz peşəkar jurnalistikanın tərəfdarıyıq. Biz belə jurnalistikanın səviyyəsinin artırılmasına köməyə hazırıq. Amma jurnalistikanın kriminallaşdırılması 21-ci əsrdə yolverilməzdir».
Son üç ayda Azərbaycanda bir neçə jurnalist şərəf və ləyaqətin təhqirinə görə, məmurlar tərəfindən məhkəməyə verilib. Onlardan biri «Milli Yol» qəzetinin redaktoru Şahin Ağabəyli parlamentin sabiq vitse-spikeri Arif Rəhimzadənin iddiası əsasında bir il azdalıqdan məhrum olunub. Digər jurnalist «24 saat» qəzetinin redaktoru Fikrət Fərəmzoğlu isə Daxili İşlər naziri Ramil Usubovun şikayəti əsasında bir il şərti olaraq azadlıqdan məhrum olunub.
Son aylarda bir sıra beynəlxalq və yerli təşiklatlar ölkə başçısına müraciət edərək, həmin maddələrin qanundan çıxarılmasını istəyiblər.
Mikloş Haraşti oktyabrın 9-da Xarici İşlər naziri Elmar Məmmədyarovla da görüşərək böhtan və təhqirə görə, azadlıqdan məhrumetmə cəzası nəzərdə tutan maddələrin Cinayət Məcəlləsindən çıxarılması imkanlarını müzakirə edib.
Oktyabrın 10-da eyni məsələ millət vəkilləri və Azərbaycandakı diplomatik korpus nümayəndələrinin iştirakıyla keçirilən dəyirmi masada da müzakirə ediləcək. Bununla bağlı QHT nümayəndələri və ATƏT ekspertlərinin hazırladığı qanun layihəsi ATƏT-in ekspertizasından da keçib.