-
Beynəlxalq Valyuta Fondu (BVF) Ukraynaya maliyyə yardımı proqramıyla bağlı qaydasını dəyişib. Əvvəl qayda beləydi ki, ölkə Rusiyaya borcunu defolt elan eləsə, Ukraynaya yardım olunmayacaqdı.
BVF sözçüsü Gerry Rice deyib ki, qurum dekabrın 8-də qaydaya dəyişiklik edib. Rusiyanın maliyyə naziri Anton Siluanov isə qərarı tənqid edib, “tələsik və qərəzli” adlandırıb, bunun “məhz Rusiyaya ziyan vurmaq məqsədilə” atıldığını deyib.
“Apellyasiya məhkəməsinə hazırlaşırıq”, o, sözlərinə əlavə edib.
Nağd pulu az olan Ukrayna dekabrın 20-dək Rusiyaya 3 milyard dollarlıq borcunu ödəməlidir. Ukrayna BVF-nin başçılıq etdiyi 40 milyard dollarlıq borc proqramı üzrə borclarını restrukturizasiya edir.